SQO ózenderinde muzdyń qalyńdyǵy 1 metrge deıin jetken
PETROPAVL. QazAqparat – Soltústik Qazaqstan oblysynda ázirge kún jylynar emes. Sınoptıkterdiń boljamynsha, qar sáýir aıynyń alǵashqy on kúndiginiń ortasynan bastap qana qarqyndy erı bastaıdy, dep habarlaıdy QazAqparat tilshisi.
«Qazgıdromet» RMM SQOF dırektorynyń orynbasary Natalıa Levınanyń aıtýynsha, bıyl qys aıtarlyqtaı sýyq bolyp, topyraq keı jerlerde 1,5 metrge deıin qatqan. Byltyr jer qyrtysy 4 naýryzdan bastap erı bastasa, bıyl ol 21 kúnge kesh bastaldy. Jaýyn-shashyn da jyldaǵy ortasha kórsetkishten 143 mm artyq túsken. Norma 53-100 mm bolsa, óńirdiń keı jerlerinde 171 mm ge deıin qar jaýǵan.
«Bıyl naýryz aıy sýyq, qar kóp jaýyp, aıazdy aýa raıy saqtaldy. Alǵashqy eki on kúndikte toqtaýsyz qar jaýdy. 25 naýryzda alynǵan málimetter boıynsha, oblys boıynsha qardyń qalyńdyǵy 12-54 sm aralyǵynda, sýdyń qory 36-dan 170 mm-ge deıin. ıAǵnı keı jerlerde qalypty jaǵdaıdan eki ese kóp. Norma boıynsha qardyń bıiktigi 7-23 sm, sý qory 41-68 mm bolýy qajet», - deıdi Natalıa Levına.
Sý tasqynynyń qanshalyqty aýqymdy bolýy aýa raıyna tikeleı baılanysty. Sáýir aıynyń basynda soltústik-batystan kelgen tsıklon óńirge qar men jańbyr ákelmek.
«Kúndiz aýa raıy jylynsa, túnde sýytady. Bul – qardyń erýine ákeledi. Alaıda qar sáýir aıynyń alǵashqy on kúndiginiń ortasynan bastap qana qarqyndy erı bastaıdy», - deıdi maman.
Qazirgi ýaqytta Esil ózeni men onyń salalarynda muzdyń qalyńdyǵy 99 sm deıin jetken. Byltyr 31 naýryzda maksımaldy kórsetkish 73 sm bolǵan.
Qalyń muz ásirese shaǵyn ózenderde keptelis týdyrady.
«Sergeev sý qoımasynda sýdyń deńgeıi 710 sm, 85 %-ǵa tolǵan. Shaǵyn ózenderde sý deńgeıi sáýir aıynyń alǵashqy on kúndiginde kóterile bastaıdy.
Sý tasqyny kezinde Sergeev sý qoımasyndaǵy sýdyń kólemi normadan 60 %-ke deıin artyp, 2 mlrd tekshe metr sý keledi dep kútilýde. Sileti sý qoımasynda 128 mln tekshe metr sý bolýy kerek bolsa, ol 157 mln tekshe metrge deıin jetpek. Úlken Torańǵul kólinde sýdyń deńgeıi 318 sm, muzdyń qalyńdyǵy 105 sm jetken. Sý tasqyny kezinde deńgeıi 420 sm deıin kóteriledi dep boljap otyrmyz», - deıdi «Qazgıdromet» RMM SQOF dırektorynyń orynbasary Natalıa Levına.
