SQO óz taýaryn qandaı elderge eksporttaı alady
PETROPAVL. QazAqparat - SQO óńirlik kásipkerler palatasynyń baspasóz qyzmeti taýardyń shyǵý tegi jónindegi sertıfıkat qaı elge kóbirek berilgenin aıtty, dep habarlaıdy «QazAqparat» HAA tilshisi.
Palata sarapshysy Oleg Jýgın mundaı sertıfıkattyń ne úshin qajet ekendigin túsindirdi. Jeńildetilgen kedendik baj salyǵyn alýǵa múmkindik beretin sertıfıkattyń TMD, Eýroodaq elderine, sondaı-aq Ózbekstan, Túrkimenstan jáne Vetnamǵa taýar eksporttaıtyn birneshe úlgisi bar.
«Otandyq ónimdi eksporttaý úshin taýardyń shyǵý tegi jónindegi sertıfıkat eń kóp berilgen memleket Ózbekstan - 374 (26 paıyz), Reseı - 345 ( 22,7 paıyz), Tájikstan - 300 ( 19,7 paıyz), Iran - 280 (18,4 paıyz)», - dedi Oleg Jýgın.
SQO kásipkerleri óz taýarlaryn Eýroodaq elderimen qatar, Aýǵanstan, Mońǵolııa, Qytaı, Qyryzstan, Túrikmenstan jáne Túrkııaǵa da eksporttaı alady.
Ózbekstanǵa bıdaı, un, jem jetkizilse, Reseıge bıdaı, makaron, zyǵyr, raps, sút-aıran ónimderi, Tájikstan, Qyrǵyzstanǵa bıdaı jóneltiledi. Iran kóbinese arpa, jem, burshaq tuqymdas jasymyq satyp alady eken. Eýroodaqqa bıdaı, raps, zyǵyr, Aýǵanstanǵa egin ónimderi, Mońǵolııaǵa - raps, Qytaı - bıdaı, raps jáne zyǵyr maıyn, Túrikmenstan - un, Túrkııa zyǵyr ónimderin satyp alady.
Jergilikti kásipkerler palatasynyń baspasóz qyzmeti habarlaǵandaı, jyl basynan beri 1717 sertıfıkat berilipti, onyń 1521-i eksportqa paıdalanylsa, 196-sy ishki saýda aınalymyna jaratylǵan.
