SQO orman sharýashylyqtarynyń materıaldyq-tehnıkalyq bazasy normaǵa 87% saı

PETROPAVL. QazAqparat – Qazirgi ýaqytta orman sharýashylyqtarynyń jalpy materıaldyq-tehnıkalyq jaraqtandyrylýy normalarǵa 87% saı. Bul týraly Soltústik Qazaqstan oblysy Tabıǵı resýrstar jáne tabıǵat paıdalanýdy retteý basqarmasynyń basshysy Beıbit Ismanov aıtty, dep habarlaıdy QazAqparat tilshisi.

Beıbit Ismanovtyń aıtýynsha, óńirde ormandy qorǵaý jáne molyqtyrýmen 12 orman sharýashylyǵy aınalysady. Prezıdenttiń elimizde 2 mlrd aǵash otyrǵyzý jónindegi tapsyrmasyna saı byltyr orman mekemeleri 1652 ga alqapta 6,9 mln dana qaıyń men qaraǵaı kóshetin ekti.

Bıyl jospar boıynsha 4100 gektar jerge aǵash otyrǵyzý qajet. Kóktemde ormanshylar 1643 ga aýmaqqa 7,7 mln kóshet ekken.

«Derekter qoljetimdi, ol orman otyrǵyzýdyń respýblıkalyq ınteraktıvti kartasyna engiziledi.

Ormandardy órtten jáne orman zııankesterinen qorǵaý úshin ózara is-qımyl josparlary, ákimdiktiń órttiń aldyn alý týraly qaýlysy qabyldandy, sondaı-aq Reseıdiń shekaralas oblystaryndaǵy áriptestermen birlesken jumys boıynsha kelisimder jasaldy. Zııankester men aýrý oshaqtaryna orman-patologııalyq monıtorıng júrgiziledi.

Orman qorynyń aýmaǵy 16 ınteraktıvti beınebaqylaý júıesimen baqylanady. Órt jaǵdaıyn nazarda ustaý úshin 2 dron paıdalanylady», - deıdi Beıbit Ismanov.

Basqarma basshysynyń aıtýynsha, orman sharýashylyqtarynda 16 órt sóndirý stantsııasy, 25 órt sóndirý avtomashınasy, 87 traktor, patrýldik avtomobılder men radıobaılanys quraldary bar.

«2021-2022 jyldary orman sharýashylyqtarynyń materıaldyq-tehnıkalyq bazasyn nyǵaıtý úshin jergilikti bıýdjet esebinen 21 traktor, 14 tirkeme jáne órt modýli satyp alyndy. Bıyl 131 mln teńgege 8 tirkemeli órt modýlin satyp alý úshin qosymsha qarajat bólindi.

Qazirgi ýaqytta orman sharýashylyqtarynyń jalpy materıaldyq-tehnıkalyq jaraqtandyrylýy normalar men normatıvterdiń 87% saı», - deıdi Beıbit Ismanov.