SQO ónerkásip oshaqtary ónimderin Reseıge shyǵaryp jatyr
ASTANA. QazAqparat - Soltústik Qazaqstan oblysynyń ákimi Qumar Aqsaqalov jumys saparymen Qyzyljar jáne Tımırıazev aýdandarynda boldy, dep habarlaıdy Soltústik qazaqstan oblysy ákimdiginiń baspasóz qyzmeti.
Beskól aýylynda óńir basshysy «Radýga» JShS-niń óndiris ornymen tanysty. Seriktestiktiń iri fılıal jelisi, ózindik ınfraqurylymy bar, onda metaldan, plastıkten 200-deı halyq tutynatyn taýarlar, sol sııaqty azyq-túlik taǵamdary shyǵarylady.
Qumar Aqsaqalovqa kásiporynnyń óndiristik ǵımarattary kórsetildi. JShS-niń bas dırektory Dmıtrıı Sharapaevtyń aıtýynsha, kompanııa óz ónimderin Qazaqstanǵa ǵana emes, Reseıdiń Omby, Chelıabi jáne Qorǵan oblystaryna eksporttaıdy. Beskól aýylyndaǵy óndiris alańdarynda paketter, plastıkalyq buıymdar, qaldyqtardan plastıka túıirshikterin, metaldan buıymdar shyǵarýǵa arnalǵan tsehtar ornalasqan.
«Qubyr óndirisin bastaǵymyz keledi. Qazir ony Reseıden satyp alyp jatyrmyz, bir aıdan keıin ózimizde shyǵaratyn bolamyz. Sonda biz ónimderimizdiń 90 paıyzy qazaqstandyq boldy dep aıta alamyz»,- dedi Dmıtrıı Anatolevıch.
Kásiporyn basshysy memlekettiń qoldaýy arqasynda óndiristi keńeıtip jatqanyn da alǵa tartty. Ótken jyldyń sáıkes merzimimen salystyrǵanda kompanııanyń ónimdiligi 100 paıyzǵa artqan. Qazir munda plastık pen metaldan 200-deı ónim túri shyǵarylady.
«Kásiporyn bızneske qoldaý retinde memleketten kómek alyp, ony memleketke salyq túrinde birneshe eselep qaıtardy. Bul óte jaqsy ádis. Prezıdenttiń tapsyrmasy boıynsha shaǵyn jáne orta bıznesti damytýdy 50 paıyzǵa jetkizýimiz kerek. Qazir oblys boıynsha 23 paıyz - bul óte az. Biz uqsatýmen aınalysatyndarǵa shaǵyn jáne orta bıznestiń úlesi kóp bolýy úshin barynsha kómektesemiz. Ol - bizdiń mindetimiz»,- dedi óńir basshysy.
Budan soń Qumar Aqsaqalov jergilikti taýar óndirýshilerdiń ónimderimen tanysty. «Dostare New» JShS oblys ákimine qazaqstandyq betonaralastyrǵysh, árleý stantsııasy, jylý jeldetkish, júk kóterý qural-jabdyqtary sııaqty ónimderin kórsetti.
«Bizde jaqsy dızaınerlerimiz jáne birneshe peshimiz bar. Kóbine Astanaǵa jumys isteımiz, sol sııaqty Petropavldyń iri kásiporyndary tapsyrys beredi. Reseımen de yntymaqtastyq ornatamyz», - dedi kompanııa dırektory Orazbek Aqtaev.
«Ahmýtdınov» JK ókilderi óńir basshysyna aǵash jańqalarynan ázirlengen bıootyndardy kórsetti. «Beskól qus fabrıkasy» «Alekrı» jáne «Altaı - SK» qus fabrıkalary ónimderiniń kórmesi de usynyldy. Qyzyljar aýdanynda konserviler de, jartylaı fabrıkattar men janýarlarǵa arnalǵan jemazyq ta, sút ónimderi de shyǵarylady. Mysaly, «Molservıs» JShS kúnine 17 tonna sút óńdeıdi. Onyń óndiris úrdisimen oblys ákimi jeke tanysty.
«Kásiporyn óńirimizdiń 4 aýdanynan jáne Aqmola oblysynan ákelinetin shıkizatpen jumys isteıdi. Eshqandaı maı paıdalanbaımyz, palma maıyn múldem kórgen emespiz. Bıyl birinshi toqsanda jaqsy jumys istedik. Shıkizatty 50 paıyzǵa kóbeıtip, soǵan oraı óndiris kólemin de arttyrdyq. Shıkizat jetkilikti, jaz aılarynda artylyp ta qalady. Ótkizýden qıyndyq joq», - dedi JShS dırektory Sergeı Chepýrko.
«Osyndaı tsehtar kóp bolýǵa tıisti, óndelýi de kóp. Biz mal sharýashylyǵymen aınalysyp, oǵan qoldaý kórsetemiz. Soltústik Qazaqstan oblysynyń osyndaı jerlerinde dástúrli kásipti damytý kerek. Astyq, nan, et, sút - barynsha damytatyn bizdiń basty qundylyqtarymyz»,- dep atap aıtty Qumar Aqsaqalov.
Óńir basshysynyń jumys sapary agrarshylarmen kezdesý arqyly jalǵasty. Búgingi kúni aýdanda 1 KS, 60 JShS, 247 ShQ men FSh jumys isteıdi. Qazir kóktemgi-dala jumystaryna qyzý ázirlik júrgizilip jatyr. Oblys ákimi astyqtyń sapasy jerdi durys óńdeýge baılanysty ekendigin taǵy da eske saldy. Qumar Aqsaqalov sharýashylyq qyzmetkerleriniń eńbekaqysyn kóbeıtý mindetin qoıdy.
Sapar sońynda óńir basshysy aýdannyń ardagerlerimen kezdesti.
