SQO oqýshylary ІІІ toqsanda qalaı oqıtyny túsindirildi
PETROPAVL. QazAqparat – Soltústik Qazaqstan oblysynda úshinshi toqsannan bastap shtattyq rejımde oqıtyn mektepterdiń sany 60-qa artpaq, dep habarlaıdy QazAqparat tilshisi.
SQO bilim basqarmasynyń basshysy Gúlmıra Kárimova Óńirlik kommýnıkatsııalar qyzmetinde ótken brıfınginde úshinshi toqsandaǵy oqýǵa qatysty túsinik berdi.
Onyń aıtýynsha, shtattyq rejımde oqytatyn mektepterdiń sany 60-qa artpaq. Osylaısha barlyq mektepterdiń 87,2%, ıaǵnı 416 mektep 34,5 myń balaǵa dástúrli túrde sabaq berýge kirisedi. Ekinshi toqsanda 356 mektepte 22 myńnan artyq oqýshy shtattyq rejımde oqydy.
«300-ge deıin oqýshysy bar mektepterdiń jumys isteýine ruqsat berilgendikten, shtattyq rejımde jumys isteıtin bilim ordalarynyń sany artqan. Al 61 mektep, negizinen qala jáne aýdan ortalyqtarynyń mektepteri qashyqtan jumysyn jalǵastyrady. Olardyń 14 663 oqýshysy bar.
Ózgerister 5, 9, 11-synyp oqýshylaryna da qatysty bolady. Atap aıtqanda: 5, 9, 11-synyp oqýshylary ata-analarynyń ótinishi boıynsha kezekshi synyptarda bilim alady», - deıdi Gúlmıra Kárimova.
Osylaısha 19 779 oqýshy úshin 1605 kezekshi synyptar jumys istemek.
«9-11 synyptar úshin sabaqtar aralas uıymdastyrylady. Negizgi pánder: algebra, geometrııa, hımııa, fızıka, bıologııa, geografııa, Qazaqstan tarıhy, tilder mektepte oqytylsa, qalǵandary qashyqtan beriledi. Qazirgi ýaqytta sabaq kestesi jasaldy. Mektep ákimshiliginiń sheshimimen 5 adamnan aspaıtyn toptarǵa qosymsha jeke sabaqtar uıymdastyrýǵa bolady. 3-toqsannan bastap mektep-ınternattardyń da qalypty jumys isteýine ruqsat berildi», - deıdi bilim basqarmasynyń basshysy.
Alaıda mektep ákimshiligi synyptardaǵy bala sanyn 15-ten asyrmaı, sanıtarııa talaptaryn qatań saqtaýy qajet.
Kolledj stýdentteri úshin de 2-semestrde ózgerister bar.
«Kolledjdiń 1-kýrs stýdentteri úshin sabaqtar aralas ótedi. Maska taǵý, 1,5 metr ara qashyqtyqty saqtaý – mindetti. Aýdıtorııadaǵy stýdentter sany 15-ten aspaýy kerek. Sabaqtar 45 mınýtqa shaqtalyp, 10 mınýttyq úziliste kabınet jýylýy tıis. Dýaldyq oqytý bolǵan jaǵdaıda sabaqtar shtattyq rejımde júrgiziledi», - deıdi SQO bilim basqarmasynyń basshysy Gúlmıra Kárimova.
