SQO-nyń Veselovka eldi mekeninde órt shyǵyp, qamys úı tutas janyp ketti
PETROPAVL. QazAqparat – Soltústik Qazaqstan oblysy M.Jumabaev aýdany Veselovka eldi mekeninde qamys úı órtendi, otbasy músheleri aman, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, turǵyn úıdiń órtenip jatqandyǵy jóninde habar «101» nómirine 19 qańtar kúni tańǵy saǵat 7.44 mınýt ketkende túsken. Órt shyqqan Veselovka men №22 órt sóndirý beketi ornalasqan Vozvyshenka eldi mekeniniń ara qashyqtyǵy 40 shaqyrym.
Órt sóndirýshiler jetkenshe baspana jalynǵa oranǵan. Mamandar birden órtti sóndirýge kiriskenimen úıdi aman alyp qalý múmkin bolmady. Órt sóndirýshiler saǵat 12.26-da órtty tolyq sóndirgenimen, aýdany 90 sharshy metr qamys úı tutas janyp ketti.
Aldyn ala boljam boıynsha, órttiń shyǵýyna otty abaısyz qoldaný sebep bolýy múmkin. Qazir naqty sebebi jáne kelgen shyǵyn mólsheri anyqtalyp jatyr.
