SQO-nyń úzdik jastary marapattaldy
PETROPAVL. QazAqparat - Soltústik Qazaqstan oblysynda ótken «Samuryq 2018» forýmynda alǵash ret jastar syılyǵy tabystaldy, dep habarlaıdy QazAqparat tilshisi.
Óńirlik kommýnıkatsııalar qyzmetinen málim etkendeı, «Jyl talanty», «Úzdik volonter», «Úzdik sportshy» syndy 10 atalym boıynsha jeńimpazdar anyqtaldy.
«Barlyq aýdan jáne Petropavl qalasynyń jastary qatysty, Reseıden qonaqtar keldi. Soltústik Qazaqstan oblysyndaǵy alǵashqy jastar jýrnalyn tanystyrdyq. Ony bıylǵy eń úlken jastar jobasyna arnap shyǵardyq. Jastar uıymdary týraly jeke bólimi bar. Jýrnal qyzyqty bolýy úshin barynsha albom formatyna uqsattyq», - deıdi Jastar saıasaty máseleleri jónindegi basqarmanyń basshysy Irına Týhvatýlına.
«Jyl serpini» nomınatsııasynda «Tegis jol» jobasy úshin jeńimpaz atanǵan Sálimhan Sábıtovke estelik músinshe men 50 myń teńge syıaqy berildi. Aıta keteıik, Sálimhan Qazaqstanda alǵash ret múmkindigi shekteýli jandarǵa arnalǵan avtomektep ashý ıdeıasyn aıtqan bolatyn.
«Uıymdastyrýshylarǵa alǵysymdy aıtamyn. Bul jańa belesterge yntalandyrady», - deıdi S. Sábıtov.
Soltústik Qazaqstan oblysy ákiminiń orynbasary Madııar Qojahmet keler jyldyń Jastar jyly dep jarııalanýy jas urpaqqa keń múmkindikter esigin ashatynyn tilge tıek etti.
Sharada qalanyń shyǵarmashylyq ujymdary forým qatysýshylaryn ónerimen tánti etti.
