SQO-nyń úsh turǵyny dalada úsip qala jazdady
PETROPAVL. QazAqparat - Soltústik Qazaqstan oblysynda polıtseıler aýyldar arasyndaǵy jolda turyp qalǵan Chevrolet Niva mashınasynyń úsh jolaýshysyn qutqardy, dep habarlaıdy QazAqparat tilshisi.
Polıtsııa departamentiniń aqparatyna súıensek, óńir turǵyndarynyń avtomobıli Aqjar aýdanyndaǵy eldi mekenderden alysta buzylyp, jolda qalǵan.
Polıtseılerge tótenshe jaǵdaılar departamentiniń kezekshisi qońyraý shalyp, Petropavldan Aqjar aýdanynyń Kıev aýylyna bara jatqan mashınanyń júrgizýshisi jáne eki jolaýshysynan 23:30-da habar-oshar úzilgenin aıtqan. Olardyń biri 80-nen asqan ata bolǵan.
«Aqjar aýdandyq polıtsııa bóliminiń bastyǵy Marat Nurahmetov izdeý sharalaryn uıymdastyrdy. Belgili bolǵanyndaı, mashına elsiz jerde buzylyp, óship qalǵan. Qarańǵy tún, júrgizýshi men jolaýshylardyń telefondarynyń qýaty bitip, sónip qalýy, olardy izdeýdi qıyndatty», - dep málimdedi baspasóz qyzmetiniń ókilderi.
Tańǵa qaraı júrgizýshi Aqjarqyn aýylyna jetip, ózi týraly habar bere alǵan. Sonyń izi boıynsha óship qalǵan mashınany taýyp, jolaýshylardy jetkizý múmkindigi týdy.
Polıtseıler men qutqarýshylar aıazdy túnde jolǵa shyqpaýǵa keńes beredi.
Aldaǵy kúnderi Soltústik Qazaqstan oblysynda mınýs 35-40 gradýs aıaz bolady.
Olesıa Jýoven
