SQO-nyń Ýálıhanov aýdanyndaǵy eldi meken sý tasqynynan aman qaldy
PETROPAVL. QazAqparat - Soltústik Qazaqstan oblysynyń Sh.Ýálıhanov aýdanyndaǵy Qýlykól aýyly tıisti is-sharalardyń nátıjesinde tasqyn sýdan zardap shekken joq. Bul jaıynda óńir basshysy Qumar Aqsaqalov Feısbýktegi paraqshasynda jazdy, dep habarlaıdy QazAqparat tilshisi.
«Men úsh kúnnen beri oblysymyzdyń eń shetki núkteleriniń biri - Sh.Ýálıhanov aýdanyndaǵy Qýlykól aýylynda júrmin. Petropavl qalasy men eldimekenniń ara qashyqtyǵy - 559 shaqyrym. Qaratal jáne Qýlykól aýyldarynda úshinshi kún jedel shtab jumys istep jatyr. Barlyq qyzmetter kúni-túni kezekshilik etýde. Sý aýylǵa kirmes úshin jaǵany bekittik. Nátıjesinde, Qýlykól tasqyn sýdan zardap shekpeıdi», - dep jazdy Qumar Aqsaqalov.
Oblys ákimi óz oqyrmandaryna tasqyn sý kelgen eldi mekenderdegi turǵyndardyń ómirine, densaýlyǵyna, mal-múlkine esh zııan kelmeýi úshin qajetti sharalardyń qolǵa alynǵanyn jetkizdi. Máselen, Qaratal aýylynyń turǵyndary der kezinde Qýlykóldegi evakýatsııalyq beketke kóshirildi.
Budan basqa Qumar Aqsaqalov aýyldarǵa sýdyń qaıdan kelgenin aıtty.
«Aqmola oblysynda ornalasqan Sileti sý qoımasynan ár sekýnd saıyn 574 tekshe metr sý jiberilip jatyr. Bul jyldaǵy kórsetkishten anaǵurlym joǵary. Úsh kúnniń ishinde osy eki aýylǵa Siletiden shamamen 154 mln tekshe metr sý keldi. Salystyrý úshin aıtaıyn: osydan 4 jyl buryn barlyq sý tasqyny kezinde, ıaǵnı bir aıdyń ishinde 330 mln tekshe metr sý kelgen bolatyn», - dep jazdy Qumar Aqsaqalov.
