SQO-nyń turaqtandyrý qorynda 3 myń tonnadan astam azyq-túlik bar
«Nur Otan» partııasy SQO fılıaly baspasóz qyzmetiniń málimetinshe, búgin «Nur Otan» partııasy SQOF janyndaǵy óńirlik damý jónindegi qoǵamdyq keńestiń otyrysynda turaqtandyrý qorynyń jumysy talqyǵa tústi.
SQO kásipkerlik jáne ındýstrııalyq-ınnovatsııalyq damý basqarmasy basshysynyń orynbasary Danııar Isaevtyń aıtýynsha, 2022 jylǵa 5 myń 200 tonnaǵa jýyq ónim satyp alynǵan. Taǵy jergilikti taýar óndirýshilerden 3 myń 935 tonna satyp alý josparlanǵan. Qazirgi ýaqytta turaqtandyrý qorynan úlken kólemde qaraqumyq jarmasy, kúrish, kúnbaǵys maıy, un, makaron ónimderi, qant, tuz, qus eti men kókónister satylyp jatyr.
«Áleýmettik mańyzy bar azyq-túlikke 19 ónim kirse, sonyń 12 túri 26 saýda jelisinde jáne bazarlardaǵy turaqtandyrý qorynyń saýda oryndarynda satylyp jatyr. Keı ónim aýyl sharýashylyǵy taýar óndirýshilerden tikeleı jetkiziledi. «Radýga» JShS-ne jeńildetilgen qaryz berilip, nátıjesinde dúken sórelerinen «Maıskoe» kúnbaǵys maıyn 555 teńgege tabýǵa bolady. Sondaı-aq, kókónis baǵasyn turaqtandyrý úshin kartop, sábiz jáne pııaz satyp alý boıynsha kelissózder júrgizilip jatyr», - deıdi Danııar Isaev.
Saýda jelileriniń, kóterme saýdamen aınalysatyn kásiporyndardyń basshylarymen jáne kásipkerlermen áleýmettik mańyzy bar azyq-túlik ónimderiniń baǵasyn tómendetý týraly 619 memorandýmǵa qol qoıyldy. Osyǵan qaramastan, óńirlik damý jónindegi keńestiń tóraǵasy memlekettik organdar tarapynan baǵany negizsiz kóteretin naryq sýbektilerine baqylaýdy kúsheıtýdi, sondaı-aq tamaq ónimderine shekti baǵalardy belgileýdi usyndy.
Qoǵamdyq keńeste tórt túlikti jemazyqpen qamtamasyz etý máselesi de qozǵaldy. Qazir oblysta shamamen 390 myń iri qara mal, 430 myń qoı-eshki jáne 134 myń jylqy bar. Mal qystap shyǵýy úshin 850 myń tonna shóp daıyndaý qajet.
«Osy ýaqytqa deıin oblys boıynsha 833 myń tonna shóp daıyndaldy, bul qajettiliktiń 98 %-y. Budan basqa jetkilikti deńgeıden artyq - 197,9 myń tonna pishendeme, 106,7 myń tonna súrlem - qajettilik 194 myń tonna jáne 242,3 myń tonna saban – qajettilik 784 myń tonna daıyndaldy. Jeke qosalqy sharýashylyqtar úshin 498,3 myń tonna shóp ázirlendi, bul qajettiliktiń 97,7% quraıdy. Oblys boıynsha 122 myń jeke turǵyn úı bar, onyń jartysy mal ustaıdy. Bul turǵyndar 98 % shóppen qamtamasyz etilgen», - deıdi aýyl sharýashylyǵy jáne jer qatynastary basqarmasynyń basshysy Meıram Meńdibaev.
Jem-shóp daıyndaý shyǵyndaryn azaıtý úshin aýyl sharýashylyǵy taýaryn óndirýshilerge qosymsha 4,7 myń tonna kóleminde arzandatylǵan janar-jaǵar maı bólindi, sondaı-aq óńirde aýyl sharýashylyǵy jármeńkeleri ótkzilip keledi. Memlekettiń qoldaýyn kórip otyrǵan agroqurylymdardyń basshylary men aýyldyq okrýgterdiń ákimdikteri arasynda halyqqa azyq-túlikti tómendetilgen baǵamen satý boıynsha memorandýmdar jasaldy.
