SQO-nyń tótenshe jaǵdaıdan zardap shekken 300 turǵynyna materıaldyq kómek kórsetildi
PETROPAVL. QazAqparat - SQO-da órtten, sýdan zardap shekken 300 turǵynǵa 8,5 mln teńgeniń materıaldyq kómegi kórsetildi, dep habarlaıdy QazAqparat tilshisi.
Kómek alǵandardyń biri - Vera Ostanına. Bıyl naýryz aıynda onyń baspanasy tirnektep jınaǵan bar dúnıe-múlkimen janyp ketti. Dalada qalǵan olarǵa Qazaqstannyń Qyzyl Aı qoǵamy habarlasyp, kómek kórsetti.
«Kútpegen jaǵdaı boldy, qýanyshtymyn. Dalada qalǵan bizder úshin qazir qandaı kómek bolsa da mańyzdy. Bergen qarajatqa azyq-túlik, kıim-keshek, dári jáne qalǵanyna qurylys materıaldaryn alamyz» , - deıdi Vera Ostanına.
Tatıana Pıpýs - jeti balasy bar kópbalaly ana. Apatty dep tanylǵan úıde turyp jatyr. Kóktemde baspanaǵa sý kirgendikten qabyrǵalardy zeń basqan.
«Birer kún buryn habarlasyp, «270 myń teńgesi bar kómek kartasyn beremiz» dedi. Biz úshin ol kóp aqsha. Balalarǵa kıim-keshek, azyq-túlik alamyz, úlken ulym aýyrady. Onyń emine aı saıyn 45 myń teńge kerek - soǵan jumsaımyz. Bizge kómek kórsetip jatqan qor men uıymdarǵa alǵysym sheksiz», - deıdi kópbalaly ana.
Arnaıy kómek kartalaryn jergilikti jerlerde Qyzyl Aı qoǵamy muqtaj jandarǵa taratyp jatyr. Olardyń tizimi Tótenshe jaǵdaılar departamenti mamandarynyń jáne Petropavl saıajaıshylar qoǵamynyń kómegimen jasaldy.
«Bul joba halyq úshin óte kerek. Ot pen sý sııaqty tótenshe jaǵdaılardan kóbine saıajaıda eńbek etetin, sol arqyly kún kórip otyrǵan zeınetkerler zardap shegedi. Petropavl qalasynda úshinshi jyl saıajaı ýchaskelerin sý basty, sonyń saldarynan turǵyndar bıyl egindi de kesh egedi. Bul jobanyń negizgi demeýshisi Býlat Ótemuratovtyń qoryna alǵys bildiremin. Kómek kartalary kópbalaly analar úshin, turmysy tómen otbasylar úshin, jalǵyzbasty zeınetkerler úshin az da bolsa kómek», - deıdi Qazaqstannyń Qyzyl Aı qoǵamy fılıalynyń dırektory Sáýle Orazova.
Arnaıy kómek kartalarymen sýpermarketterde, dárihanalarda esh qıyndyqsyz esep aıyrysýǵa bolady.
