SQO-nyń sport basqarmasy qaıtys bolǵan velosıpedshi qyz týraly aıtyp berdi
PETROPAVL. QazAqparat - Soltústik Qazaqstan oblysynyń Dene tárbıesi jáne sport basqarmasy velosıpedshi Dana Ahmetovany jerleý rásimin uıymdastyrýǵa kómek beredi, dep habarlaıdy «QazAqparat» HAA tilshisi.
Basqarma basshysy Rýslan Esenalın 17 jastaǵy Dana Ahmetovanyń SQO qurama komandasynda Jastar chempıonatyna jáne oqý-jattyǵý jıynyna qatysqanyn aıtyp berdi.
Ol birneshe medal ákelip úlgergen edi. Jarystardyń birinde, 23 maýsym kúni kún ótip, aýrýhanaǵa túsken. Sportshy qyz 4 kún boıy es-tússiz jatty jáne besinshi kúni búırekteri jumysyn toqtatty.
Dana 7 synypta Soltústik Qazaqstan oblysynyń daryndy balalarǵa arnalǵan mamandandyrylǵan mektep-ınternatyna qabyldanǵan. Onyń jeke bapkeri - QR eńbek sińirgen bapkeri, SQO áıelder velosporty boıynsha aǵa bapker Vıktor Potapov. Qaıǵyly oqıǵaǵa deıin bapker tárbıelenýshisiniń qasynda bolǵan.
«Shákirtten aıyrylýdyń ne ekenin jaqsy bilemin. Ótken jyly meniń tárbıelenýshim Azamat Nurpeıisov qaıtys boldy. Bul óz ulyńdy joǵaltqanmen birdeı. Dananyń ata-anasy men bapkeriniń qaıǵysyna ortaqpyn. Almatyǵa keter kezde Dana medıtsınalyq tekserýden ótken, deni saý bolatyn», - dedi Rýslan Esenalın.
Ol Dana Ahmetovanyń daryndy sportshy bolǵanyn atap ótti. 17 jasynda-aq Dana velosıped sporty boıynsha QR sport sheberi atandy, QR ulttyq quramasynyń jastar quramynyń múshesi boldy, Olımpıadalyq daıyndyq ortalyǵynda esepte turǵan.
Dana Ahmetova 2000 jyly 5 mamyrda dúnıege kelgen. Sporttyq ınternat túlegi, Aqqaıyń aýdany, Toqysh aýylynyń týmasy. Qazir Dananyń ata-anasy Almatyda jáne sportshy týǵan aýylyna jerlenedi.
Búgin máıitti tekserý jumystary bastalady, sot-medıtsınalyq saraptama Dana Ahmetovanyń neden qaıtys bolǵanyn anyqtaıdy.
Eske sala keteıik, Almaty qalasynyń №7 aýrýhanasynda qazaqstandyq velosıpedshi Dana Ahmetova qaıtys boldy. 17 jastaǵy sportshy Almatyda ótip jatqan IV Jastar sporttyq oıyndarynda esinen tanyp qulaǵan jáne ony jedel járdem brıgadasy jan saqtaý bólimine jetkizgen. Dárigerler Dananyń jaǵdaıyn asa aýyr dep baǵalady. Keshe velosıpelshi qyz esin jımastan baqılyq boldy.
