SQO-nyń Solenoe kólinde 400 kg jýyq balyq qyryldy
PETROPAVL. QazAqparat – Soltústik Qazaqstan oblysy Aıtýar aýyly mańyndaǵy Solenoe kólinde 400 kelige jýyq balyq qyryldy, dep habarlaıdy QazAqparat tilshisi.
SQO boıynsha ekologııa departamentiniń málimetinshe, oqıǵaǵa baılanysty búgin, 20 shilde kúni Jambyl aýdanyndaǵy Aıtýar aýylynyń mańyndaǵy Solenoe kóline departament ókilderi, Esil oblysaralyq basseındik ınspektsııasy, SQO ákimdiginiń Tabıǵı resýrstar jáne tabıǵat paıdalanýdy retteý basqarmasy, Jambyl aýdanynyń veterınarııalyq qyzmeti, balyq sharýashylyǵynyń ǵylymı-óndiristik ortalyǵynyń qyzmetkerleri bardy.
Jumys toby sý qoımasynyń jaǵalaýyn tekserdi. Kózben sholý barysynda 400 kg mólsherinde pelıad, tuqy, móńke balyǵy ólgeni anyqtaldy. Zerthanalyq taldaý júrgizý úshin sý synamalary men ólgen balyq alyndy.
Kóldi «Vodoleı-2017» JShS jalǵa alyp, balyq sharýashylyǵymen aınalysyp jatyr. Seriktestik jumysshylary sý aıdynyn ólgen balyqtan tazartyp, ólekseni joıdy.
Ázirge balyqtyń neden qyrylǵany belgisiz.
Eske salaıyq, buǵan deıin osy aýdannyń Tabýnnoe kólinde balyq qyrylǵanyn aıtqan edik. Tıisti synamalar alynyp, zerthanaǵa jiberildi.
