SQO-nyń Sokolovka eldi mekeninde karantındik shekteýler kúsheıtildi
PETROPAVL. QazAqparat – Soltústik Qazaqstan oblysynyń Sokolovka eldi mekeninde koronavırýs ınfektsııasynyń kóptep taralýyna baılanysty búginnen bastap karantındik shekteý sharalary kúsheıtildi, dep habarlaıdy QazAqparat tilshisi.
Qyzyljar aýdanynyń bas sanıtar dárigeri Jangeldi Ibraevtiń aıtýynsha, aqpan aıynyń basynan Sokolovka eldi mekeninde koronavırýs ınfektsııasyn juqtyrýdyń 18 jaǵdaıy tirkelgen. Sonyń tórteýi ótken aptada anyqtalǵan.
«Oblystyq shtabtyń sheshimimen eger de eldi mekende 10 jáne odan da kóp aýyrǵan adam tirkelse, tizbekti úzip, juqtyrǵandar sanyn azaıtý úshin karantındik shekteý sharalary kúsheıtiledi. Alaıda blok-postar qoıylmaıdy. Ótken aptada Sokolovkada 4 jaǵdaı tirkelse, onyń aldynda 14 adamda KVI anyqtaldy. Inkýbatsııalyq jaǵdaı 14 kún bolǵandyqtan shekteý sharalaryn qatańdatýǵa sheshim qabyldadyq», - deıdi Jangeldi Ibraev.
Aýdannyń bas sanıtar dárigeriniń aıtýynsha, aýdanda koronavırýs boıynsha jaǵdaı turaqtalyp keledi. Aqpan aıynyń basynda 69 adamda KVI anyqtalsa, ótken aptada ol 43-ke deıin azaıdy. Qazir mundaǵy Sokolov, Ozernyı jáne Sıvkov orta mektepteri karantınge jabylyp, oqýshylary qashyqtan oqýǵa ketti.
Buǵan deıin Sokolovka eldi mekeninde karantındik shekteý sharalaryn kúsheıtý boıynsha Qyzyljar aýdany bas sanıtar dárigeriniń qaýlysy shyqqanyn aıtqan edik.
