SQO-nyń Shuqyrkól eldi mekeninde órt sóndirý beketi ashyldy
PETROPAVL. QazAqparat – Soltústik Qazaqstan oblysy Ǵabıt Músirepov aýdanyndaǵy Shuqyrkól eldi mekeninde jańa órt sóndirý beketi iske qosyldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, memlekettik órtke qarsy qyzmet organdary joq eldi mekenderde órt sóndirý beketterin qurý týraly vedomstvonyń 2019-2020 jyldarǵa arnalǵan is-sharalar jospary bar. Soǵan sáıkes Ǵ.Músirepov aýdany Shuqyrkól selosynda órt sóndirý beketi ashyldy.
SQO Ǵ.Músirepov aýdanyndaǵy Shuqyrkól aýyly - oblys ortalyǵynan shalǵaı jatqan eldi mekenderdiń biri. Aýdan ortalyǵy Novoıshım selosynan 30 shaqyrymdaı qashyqtyqta jatyr. Shuqyrkól aýyldyq okrýgine Shuqyrkólden basqa «Qazaqstannyń 15 jyldyǵy», Jańasý aýyldary da kiredi. Jalpy halyq sany 3,5 myńnan asady.
«Eldi mekenderde órt qaýipsizdigin qamtamasyz etý: adamdardyń densaýlyǵy men ómirin, jıǵan-tergen múlkin, qorshaǵan ortany tilsiz jaýdan qorǵaý – qutqarý qyzmetine artylǵan negizgi mindet. Oblystyń shalǵaı eldi mekenderinde órt sóndirý beketteriniń ashylýy - órt sóndirýshilerdiń jumysyn jeńildetip qana qoımaı, olardyń qyzmetiniń tıimdiligin arttyrady, oqıǵa ornyna jyldam jetkendikten ómirlerdi qutqarýǵa, materıaldyq qundylyqtardy saqtap qalýǵa kómektesedi», - dep atap ótti SQO Tótenshe jaǵdaılar departamenti bastyǵynyń orynbasary Nurlan Atyǵaev.
Aýdanǵa sapary barysynda Nurlan Atyǵaev órt sóndirý bólimsheleriniń materıaldyq-tehnıkalyq bazasyn jaqsartý boıynsha yntymaqtastyq sheńberinde aýdandyq bólimshege «Shtıl» markaly joǵary ónimdi apparattar tabys etti. Sondaı-aq, órt sóndirýshilerdiń otbasylaryn aralap, áleýmettik-turmystyq jaǵdaılarymen tanysty.
Mamandardyń esebinshe, qazir óńirdiń shalǵaı eldi mekenderinde 36 órt sóndirý beketi jumys isteıdi.
