SQO-nyń shalǵaı eki aýylynda «Ashyq ákimdik» front-keńsesi ashyldy
Sybaılas jemqorlyqqa qarsy is-qımyl agenttiginiń SQO boıynsha departamenti baspasóz qyzmetiniń málimetinshe, óńirdiń eń shalǵaı ornalasqan Ýálıhanov aýdanyna jumys saparymen oblys ákiminiń orynbasary Ǵanı Nyǵymetov jáne aýmaqtyq sybaılas jemqorlyqqa qarsy qyzmettiń basshysy Jarqyn Ǵalymov bardy. Olardyń qatysýymen Bıdaıyq jáne Teljan aýyldarynda «Ashyq ákimdik» front-keńseleri ashylyp, aýyldyq okrýgterdiń mamandary jumysqa kiristi.
«Front-keńselerdiń ashylýy turǵyndar úshin yńǵaıly. Aýyl halqy memlekettik qyzmetterdi eshqaıda barmaı ózderinde alady. Bastaǵan jumysty odan ári jetildirý qajet. Tólem jasaý úshin bankomattar men termınaldardy ornatýdy qarastyrý kerek», - dedi Jarqyn Ǵalymov.
Oblys ákiminiń orynbasary, «Qyzyljar – adaldyq alańy» jobasynyń kýratory Ǵanı Nyǵymetov «ashyq ákimdikter» endi oblystyń eń shalǵaı aýyldarynda da qoljetimdi ekenin atap ótti.
«Eger ótken jyly «bir tereze» qaǵıdaty boıynsha jumys isteıtin «ashyq ákimdikter» oblystyń barlyq aýdan ortalyqtarynda qurylsa, endi osy jyly biz aýyldyq okrýgterde ashyp jatyrmyz. Osylaısha, memlekettik qyzmet kórsetý mádenıeti bizdiń aýyldarǵa da keledi. Bul format adamdar úshin yńǵaıly, munda ınternet bar, qart adamdarǵa qyzmetterdi elektrondy túrde alýǵa árdaıym kómek kórsetiledi», - deıdi Ǵanı Nyǵymetov.
Búgingi tańda oblystyń tórt aýyldyq ákimdigi halyqqa qyzmet kórsetýdiń jańa modeline kóshti.
Sapar barysynda SQO Sybaılas jemqorlyqqa qarsy qyzmettiń basshysy aýdandyq deńgeıdegi sybaılas jemqorlyqqa qarsy is-qımyl jónindegi vedomstvoaralyq komıssııanyń otyrysyn ótkizip, aýdandyq ortalyqtandyrylǵan kitaphanadaǵy «Parasat joly» ortalyǵynyń jumysyn kórdi.
