SQO-nyń respýblıkalyq joldarynda 11 jylytý beketi daıyndaldy
SQO avtojoldardyń uzyndyǵy boıynsha respýblıkada Shyǵys Qazaqstan jáne Qostanaı oblystarynan keıin – úshinshi orynda. 9 myń shaqyrymnyń 1468 shaqyrymy – respýblıkalyq mańyzy bar joldar. Bir aı buryn SQO memlekettik múlik jáne jekeshelendirý departamenti taǵy 502 shaqyrym joldy respýblıkalyq menshikke berý týraly qabyldap-tapsyrý aktisin bekitti.
«QazAvtoJol» UK» AQ Soltústik Qazaqstan oblystyq fılıalynyń málimetinshe, bıyl respýblıkalyq mańyzy bar joldardy kútip ustaýǵa 1 mlrd 707 mln teńge bólinse, qarasha-jeltoqsan aılarynda 148 mln teńgesi jumsalmaq. Joldyń paıdalanýǵa berilýine baılanysty taǵy 100 mln teńge qosymsha bólindi.
«Boran, qatty aıazdy kúnderi tótenshe jaǵdaıǵa jol bermeý maqsatynda oblys aýmaǵynda táýlik boıy kezekshilik atqarylady. Jolda qalǵan kólikter bolsa – kómek kórsetiledi. Demalys, mereke kúnderine kezekshilik qurastyryldy. Avtojoldarda apatty nemese tótenshe jaǵdaı bolǵanda jeke quramdy jınaý tártibi, sondaı-aq qar alatyn qaýipti ýchaskelerge tehnıka bekitildi. Qysta ákimshilik polıtsııa, jergilikti polıtsııa qyzmeti basqarmalary, tótenshe jaǵdaılar departamenti tyǵyz qarym-qatynasta jumys isteımiz», - deıdi «QazAvtoJol» UK» AQ-nyń oblystyq fılıalynyń dırektory Bolatbek Aıtbaev.
Budan basqa, avtojoldardyń boıynda 13 óndiristik jol-paıdalaný pýnkti ornalasqan. Solardyń negizinde 102 orynǵa arnalǵan 11 jylytý beketi jumys isteıdi.
Mamandardyń aıtýyna qaraǵanda, joldardy qardan tazalaýǵa 80 arnaıy tehnıka daıyn. 204 adam jumys isteıdi. Kóktaıǵaqqa qarsy qysqy maýsymda 2 200 tekshe metr tuz ben qum aralas qospa qoldanylýy tıis bolsa, onyń 1400 tekshe metri ázir.
