SQO-nyń polıtsııa vedomstvosynda 500-ge jýyq áıel eńbek etedi

PETROPAVL. QazAqparat – Soltústik Qazaqstan oblysynyń polıtseıleri názik jandy áriptesteri men salanyń ardager áıelderin 8 Naýryz merekesimen quttyqtady, dep habarlaıdy QazAqparat tilshisi.

SQO Polıtsııa departamentiniń bastyǵy Marat Tólebaev merekege oraı uıymdastyrylǵan saltanatty jıynda polıtsııa qyzmetinde áıel adamnyń alatyn orny erekshe ekendigine toqtala ketti. Azamattardyń zańdy quqyqtary men múddelerin saqtap ári qorǵaı otyra, qylmysqa qarsy kúresýde, jalpy atqaryp jatqan iske áıelder baǵa jetpes úles qosýda.

«Kópbalaly analarǵa, ardager áıelderge, tyl eńbekkerlerine, barlyq qyzmetkerlerge qyzmette jetken jarqyn jetistikterińiz úshin alǵys bildiremin. Qymbatty áıelder qaýymy, osy aıtýly kúni sizderge shyn júrekten myqty densaýlyq, súıispenshilik, baqyt, otbasynyń amandyǵyn, barlyq arman-tilekterińizdiń oryndalýyn, eńbek pen qyzmette jetistikter, kóktemniń jaıma shýaq kúnindeı kóterińki kóńil-kúı tileımin», - dedi oblystyń bas polıtseıi.

Bul kúni 37 áıel qyzmetker Qurmet gramotalarymen, alǵys hattarmen, estelik medaldarmen, tósbelgilermen marapattaldy. Taǵy altaýyna kezekti arnaýly ataqtar tabys etildi: tórteýi «polıtsııa maıory» shenin ıelense, ekeýi «polıtsııa leıtenanty» pogonyn ıyqtaryna taqty. «Qoldaýshy», «Eren eńbegi jáne qosqan úlesi úshin» estelik medaldarymen, SQO PD alǵys hatmen jáne gramotasymen ishki ister organdarynyń alty áıel ardageri marapattaldy.

Saltanatty is-shara oblystyq polıtsııa vedomstvosyndaǵy mádenı ortalyqtyń ártisteri daıyndaǵan áserli kontserttik baǵdarlamamen aıaqtaldy.

SQO Polıtsııa departamenti baspasóz qyzmetiniń málimetinshe, polıtsııa qatarynda 494 qyz-kelinshek qyzmet etedi. Olardyń 363 – ofıtser men serjant, 81 – ákimshilik memlekettik qyzmetshi, 50-i eńbek sharty boıynsha jumys isteıdi. Oblystyq polıtsııa apparatynda 6 áıel derbes bólinisti basqarady, onyń 3-eýi «polıtsııa polkovnıgi» sheninde.