SQO-nyń polıtseıleri jyl basynan beri izdeýde júrgen 84 adamdy tapty
PETROPAVL. QazAqparat - Soltústik Qazaqstan oblysynyń polıtseıleri jyl basynan adamnyń joǵalýyna qatysty 88 derekti tirkese, onyń 84-inde izdeýdegi adam tabyldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, habarsyz ketken 58 adam bir táýliktiń ishinde tabylǵan. Kóp jaǵdaıda ishkilikke salynǵan maskúnemder joǵalady. Ádette tártip saqshylary olardy kóńil kóterý oryndarynan nemese «dostarynyń» arasynan tabady eken.
Oblysta jyl basynan kámelet jasyna tolmaǵan 16 jasóspirimge izdeý jarııalandy. Balalardy tez arada tabý úshin ıývenaldyq polıtseıler men ýchaskelik ınspektorlar da jumyldyrylady. Jasóspirimderdiń aralasatyn qurbylary, jıi bolatyn jerleri tekseriledi. Nátıjesinde barlyq bala kezekshi táýlik ishinde tabylyp, ata-anasyna tabystaldy.
«Umytshaqtyqpen aýyratyn adamdardy izdeýde qıynshylyqtar týady. Óıtkeni olardyń júris-turysyn boljap bolmaıdy. Soǵan qaramastan biz izdeýdi toqtatpaımyz», - deıdi SQO PD Krımınaldyq polıtsııa basqarmasynyń bastyǵy Petr Klımov.
Qazirgi tańda Petropavl polıtseıleri 1954 jyly týǵan Elena Aleksandrovna Naıfty izdestirýde. Tártip saqshylarynyń aıtýynsha, áıel qalany durys bilmeıdi, ishinara este saqtaý qabiletinen aıyrylǵan. Oblys ortalyǵyna em qabyldaý úshin byltyr mamyr aıynda kelgen eken. Týysynyń páterinen shyǵyp ketken odan áli kúnge habar joq. Boıy 168 sm, aryqsha kelgen, uzyn jıren shashty. Sol kúni basynda qara beret, ústinde aqshyl tústi kúrte jáne uzyn jasyl kóılek bolǵan.
Polıtseıler joǵalǵan áıel týraly qandaı da bir aqparat bolǵan jaǵdaıda 102 telefon nómirine habarlasýdy suraıdy.
