SQO-nyń Qyzyljar aýdandyq sotynda front-ofıs jumysyn bastady
PETROPAVL. QazAqparat - Soltústik Qazaqstan oblysynyń Beskól eldi mekeninde «Úlgili sot» baǵdarlamasyn iske asyrý sheńberinde alǵashqy aýdandyq front-ofıs ashyldy, dep habarlaıdy QazAqparat tilshisi.
Zaman talabyna saı halyqqa qyzmet kórsetetin keńseni ashýdaǵy maqsat - halyqtyń sot júıesine degen senim deńgeıin arttyrý, sot jumysynyń ashyqtyǵy men qoljetimdiligin qamtamasyz etý.
«Úlgili sot» baǵdarlamasy aıasynda oblys aýdanynda alǵash ashylǵan front-ofıske sýdıalar, jergilikti atqarýshy organdar ókilderi, medıatorlar men advokattar qatysty.
Bul jerge kelýshilerdi konsýltanttar qarsy alyp, olardyń barlyq suraqtaryna jaýap berýge daıyn. Onda úsh: aqparattyq ortalyq, kiris keńsesi jáne kútý aımaǵy bar. Aımaqtardyń barlyǵy keń zalda ornalasqan. Zamanaýı tehnıkamen, yńǵaıly jıhazdarmen jabdyqtalǵan. Kelýshiler úshin tegin WI-FI qyzmeti de bar.
«Halyqqa yńǵaıly jaǵdaı jasaý úshin ashyldy. Bul jerge kelgen turǵyndarǵa tolyq qyzmet túri kórsetiledi. Kireberiste kelýshilerdiń barlyq suraqtaryna jaýap beretin bilikti maman turady. Aqparattyq ortalyq «kedergisiz qaǵıdat» prıntsıpi boıynsha jumys isteıdi. Bul oblys boıynsha aýdanda ashylyp otyrǵan alǵashqy front-ofıs. Tórt quramdy sot, bul jerde qaralatyn ister de kóp. Sol sebepti birinshi kezekte ashyldy», - deıdi SQO sottyń azamattyq ister jónindegi sot alqasynyń tóraǵasy Aıdar Smaǵulov.
Front-ofıste medıatorlarǵa jeke kabınetter qarastyrylǵan. Aıta ketý kerek, byltyr barlyq istiń 3%, ıaǵnı 1700 is sotqa jetpeı oń sheshilgen. Qazir osyndaı front-keńseler Petropavldaǵy barlyq sottarda bar. Endi basqa da aýdan ortalyqtarynda ashý josparlanǵan.
