SQO-nyń qylmystyq atqarý júıesinde 6 túrli ult ókilderi eńbek etedi
PETROPAVL. QazAqparat – Soltústik Qazaqstan oblysy boıynsha qylmystyq atqarý júıesi departamentinde 6 túrli - qazaq, orystan basqa, tatar, chývash, ýkraın jáne nemis ultynyń ókilderi eńbek etedi. Olardyń biriniń ata-ájeleri kezinde Qazaqstanǵa tyń ıgerýge kelse, endi biriniń týǵan-týystary solaqaı saıasattyń saldarynan jer aýdarylǵan, dep habarlaıdy QazAqparat tilshisi.
Svetlana Borısenko – SQO boıynsha QAJD aǵa ınspektor-psıhology, ádilet maıory. Іshki ister organdarynda eńbek etip júrgeninen 15 jyldaı bolǵan. Negizgi mindeti jeke qurammen baılanysty, olarǵa psıhologııalyq kómek, aqyl-keńes beredi. Jumysqa jańadan kelgen jas qyzmetkerlerge tezirek qyzmetke beıimdelýge kómektesedi. Túrli trenıngter ótkizip, qyzmetkerlerdi shtattan tys oqys oqıǵalarǵa ázirleıdi.
«Men de, meniń áke-sheshem de Qazaqstanda týǵan. Men úshin Qazaqstan – meniń Otanym. Osy jerde týyp, óstim, jetildim. Ózim 1985 jyly qazirgi M.Jumabaev aýdanynda dúnıege keldim. Al ata-ájem Ýkraınadan qonys aýdarǵan eken. Ájemdi Qyrymnan jer aýdarǵan. Ol taza nemis, Erna Fransovna Gerner. Sondyqtan mende nemis ultynyń da qany bar. Atam – ýkraın, Qazaqstanǵa 1950 jyldary tyń ıgerýge kelgen eken. Olar osy jerde tanysyp, shańyraq kóterip, órkenin jaıdy», - deıdi Svetlana Borısenko.
Svetlana M.Qozybaev atyndaǵy Soltústik Qazaqstan ýnıversıtetiniń túlegi. Psıholog bolýdy mektepte júrgende-aq sheship, ózin-ózi daıyndaı bastaıdy. Muǵalim bolyp jumys isteıtin anasynyń psıhologııa-pedagogıka týraly kitaptaryn oqyp, arnaıy ádebıetpen tanysady. Al ishki ister organdaryna kelýge naǵashy atasynyń tárbıesi áser etken eken.
«Meniń naǵashy atam 3 jyl áskerde Qıyr Shyǵysta bolǵan. Minezi qatty, patrıot edi. Ol bizge kishkentaıymyzdan Otanǵa adal bolý kerek dep qulaǵymyzǵa quıyp otyratyn. Óziniń áskerde qalaı qyzmet atqarǵanyn, ol jaqtan ofıtser bolyp oralǵanyn aıtatyn. Odan basqa bizdiń áýlette áskerı qyzmetpen baılanysty eshkim joq. Bir jaǵynan áke-sheshemniń de armanyn oryndadym. Olar meniń zańger bolǵanymdy qalady, ol kezde sándi mamandyqtardyń biri edi. Qazir meniń jumysym zańgerlikpen de baılanysty», - deıdi ádilet maıory.
Svetlana Borısenko tarıhı Otany – Ýkraınaǵa saıahattap barýdy armandaıdy.
«Ýkraınada, ókinishke oraı, bolǵan emespin. Atam baryp keldi, onyń aıtýynsha, Ýkraınanyń batysynda, Chernıgov, Lvov oblystarynda bizdiń týystarymyz kóp. Qazir hat-habar almasyp turamyz, ol jaǵynan qıyndyq joq. Árıne, baryp kórgim keledi, tildi úırensem deımin, qazir azdap túsinemin», - deıdi Petropavl turǵyny.
Svetlananyń óz otbasy da – kóp ultty. Kúıeýi – armıan ultynyń ókili. Uly balabaqsha jasynda.
«Sol sebepti men úshin 1 mamyr – Qazaqstan halqynyń birligi kúni merekesiniń orny erekshe. Balama únemi onyń mán-maǵynasy jaıynda aıtyp, túsindirip otyramyn. Biraq ulym áli kishkentaı. Ádette bul kúni otbasymyzben kóshege shyǵyp, merekege oraı uıymdastyrylǵan is-sharalardy tamashalaımyz. Biz bárimiz osy keń-baıtaq Qazaqstannyń azamatymyz, ul-qyzymyz, ultymyz basqa bolǵanymen ol bizge tatý-tátti turýǵa kedergi emes», - deıdi Svetlana Borısenko.
Aǵaındy Evgenıı jáne Grıgorıı Ivanovtar da SQO boıynsha qylmystyq-atqarý júıesi departamentinde eńbek etedi. Grıgorıı – ES 164/1 túzetý mekemesinde jasaq bastyǵy. Onyń negizgi mindeti sottalǵandar jáne qamaýǵa alynǵandar arasynda tárbıelik, áleýmettik jáne psıhologııalyq jumys júrgizý.
Grıgorııdiń aǵasy Evgenıı ES 164/3 mekemesinde bólim bastyǵy bolyp qyzmet atqaryp júr. Onyń negizgi mindeti - sottalǵandar jáne qamaýǵa alynǵandar arasynda tárbıe jumystaryn júrgizý.
Aǵaıyndylardyń ulty – chývash. Aıtýlarynsha, áke-sheshesi 1960-shy jyldary Bashqurstannan tyń ıgerýge kelgen. Búginde qazaq jeri olarǵa qutty qonysqa aınaldy.
«Departament pen onyń mekemelerinde 350 adam eńbek etedi. Qyzmetkerlerdiń 51 % – qazaq, 41 % – orys, al qalǵan 9 %yn basqa ult ókilderi, ıaǵnı tatarlar, ýkraınder, nemister men chývashtar quraıdy», - deıdi SQO boıynsha QAJD bastyǵy Rýstan Ahmetjanov.
