SQO-nyń kýrorttyq aımaǵynda órt sóndirý beketi ashyldy
PETROPAVL. QazAqparat – Soltústik Qazaqstan oblysynyń Aıyrtaý aýdany, Shalqar aýylynda jańa órt sóndirý beketi ashyldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, órt sóndirý beketi eki myń turǵyny bar Shalqar jáne Lobanov eldi mekenderiniń qaýipsizdigin qamtamasyz etedi.
«Órt sóndirý beketiniń jaqyn mańda ornalasýy órt bolǵan jaǵdaıda jyldam qımyldaýǵa, zardap shegýshilerdiń sanyn jáne shyǵyn mólsherin azaıtýǵa sep bolmaq. Shalqar jáne Lobanov eldi mekenderi kýrorttyq aımaqta, qaraǵaı-qaıyńnyń ortasynda ornalasqan. Sondyqtan endi jalyn tutanǵan jaǵdaıda ony órshitpeı, birden sóndirýge múmkindik bar», - deıdi órt sóndirý qyzmetiniń mamandary.
Aıyrtaý aýdandyq ákimdigi órt sóndirý beketin arnaıy kıim-keshek, motopompa jáne basqa da tehnıkalyq kerek-jaraqpen qamtamasyz etti.
Eldi mekender aýdan ortalyǵynan shalǵaı ornalasqan. Sondyqtan da aýylda órt sóndirý beketiniń ashylǵanyna turǵyndar qýanyp, alǵys bildirdi.
