SQO-nyń kardıologııalyq ortalyǵyna zamanaýı angıograf qoıyldy

PETROPAVL. QazAqparat – SQO Kardıologııalyq ortalyq naqty dıagnoz qoıyp, ınsýlt pen júrek talmasyn emdeýge múmkindik beretin zamanaýı tsıfrly angıografpen tolyqty, dep habarlaıdy QazAqparat tilshisi.

Jańa qondyrǵynyń kómegimen júrek-qantamyrlary júıesine zertteý jasalady jáne otalar júrgizýge bolady. Oblys ákimi Qumar Aqsaqalov kardıologııalyq ortalyqqa baryp, jańa qurylǵynyń artyqshylyǵymen tanysty.

Bul týraly SQO ákimi Qumar Aqsaqalov Instagram paraqshasynda jazdy.

«Kardıoortalyqqa zamanaýı tsıfrly angıograf qoıyldy. Sońǵy úlgidegi qondyrǵy ınsýlt pen ınfarktty emdeýde úzdik sanalady. Oblystyq aýrýhanaǵa dál osyndaı angıograf qoıamyz», - dep jazdy oblys ákimi.

Aımaq basshysy aı sońyna deıin oblystyq aýrýhanada MRT apparatynyń iske qosylatyndyǵyn jetkizdi. Qondyrǵy eki aýysymda jumys istep, bul qazirgi kezekti birshama qysqartpaq. Jyl sońyna deıin taǵy 2 MRT alynady. Onyń biri oblystyq balalar aýrýhanasyna ornatylsa, ekinshi onkologııalyq dıspanserge qoıylmaqshy. Kelesi jyly 2 KT apparaty alynyp, onyń biri qalalyq kópsalaly aýrýhanaǵa berilse, ekinshisi Ǵabıt Músirepov aýdanyna jetkizilmekshi.

«Bunyń barlyǵy soltústikqazaqstandyqtarǵa basqa óńirlerge shyqpaı, sapaly em alýǵa múmkindik bermek», - dedi Qumar Aqsaqalov.

Kardıologııalyq ortalyq jaqynda taǵy bir jańa qondyrǵymen tolyqty. Ýltra dybystyq zertteý apparatyn satyp alýǵa respýblıkalyq bıýdjetten 74 mln teńge bólindi.

«Eho-kardıolog» dep atalady. Bul ÝZI apparatynyń múmkindigi mol. 3d men 4 d sapasynda beıneni kórsetedi. Onyń kómegimen naqty dıagnoz qoıylyp, em sharalaryn der kezinde jazyp bere alamyz», - deıdi Kardıologııalyq ortalyqtyń dırektory Azamat Maǵzumov.

Jalpy ótken jyldyń qorytyndysy boıynsha, júrek-qan tamyrlary aýrýlarynan kóz jumatyndardyń sany 12%, onyń ishinde júrek talmasynan qaıtqandardyń sany 3,4% azaıǵan.