SQO-nyń Imantaý aýylynda tasqyn sý jylyjaıdy shaıyp ketti
PETROPAVL. QazAqparat – Soltústik Qazaqstan oblysynda shaǵyn ózenderdiń sýy molaıyp, tası bastady. Vozvyshenka eldimekeni mańyndaǵy Aqanburlyq ózeniniń deńgeıi bir táýlikte 273 sm deıin kóterildi, dep habarlaıdy QazAqparat tilshisi.
SQO tótenshe jaǵdaılar departamentiniń málimetinshe, Ǵ.Músirepov atyndaǵy jáne Aıyrtaý aýdandaryndaǵy shaǵyn ózenderde sý deńgeıi kóterilip jatyr. Esil ózeninde de ózgeris bar. Alaıda ázirge qaýipti deńgeıge jetken joq.
«Kúnniń jylynýyna baılanysty aǵyn sýlar paıda bolyp, ózen-kólderge quıylyp jatyr. Sý qoımalaryna kúndelikti monıtorıng júrgizemiz. Eldimekenderdi sý basý jaǵdaılary tirkelgen joq. Tek eki avtojoldyń ústinen sý ketti», - deıdi SQO TJD basqarmasynyń bastyǵy Rústem Jumaǵalıev.
Imantaý eldimekenindegi Zmeıka ózeni erigen qar sýymen tolyǵyp, arnasynan shyqty. Dıametri 500 mm qubyr sýdy ótkize almaǵan. Saldarynan sý jolyndaǵy bir jylyjaıdy shaıyp ketti.
«Qazir Imantaý aýylynda sý joq. Jaǵdaı turaqtaldy. Aryqtar qazylyp, sý alqapqa jiberildi. Jalpy barlyq aýdandarda sý basý qaýpi bar. Baqylaýda ustap otyrmyz. Osy aptada aýa temperatýrasy +15 gradýske deıin joǵarylaıdy. Qazir oblys aýmaǵynyń 80 %-ynda qar jatyr», - deıdi Rústem Jumaǵalıev.
Sileti sý qoımasy qazirgi ýaqytta 90 %-ǵa tolǵan. Erneýinen asý úshin 59 sm jetpeıdi. Sergeev sý qoımasy 91 %-ǵa tolǵan. Esil ózenindegi muz jarylǵan joq. Osy aptada aýa temperatýrasynyń jylynýyna baılanysty muz júre bastaıdy degen boljam bar.
Qazir oblystyń eki aýdanynda qutqarýshylardyń arnaıy toby jumys istep jatyr. Búgin Ýálıhanov aýdanyna kóktemgi sý tasqynymen kúreske osyndaı arnaıy jaraqtandyrylǵan top jiberiledi.
«Qazgıdromet» RMK SQO fılıalynyń málimetinshe, óńirdiń shaǵyn ózenderinde – Imanburlyq, Aqanburlyq, Muqyr, Sharyqta sý deńgeıi kúnnen-kúnge kóterilip keledi. Bir táýliktiń ishinde Vozvyshenka eldimekeni mańyndaǵy Aqanburlyq ózeninde sý deńgeıi 273 sm deıin kóterilgen.
