SQO-nyń emdeý mekemelerine zamanaýı qondyrǵy alýǵa 4 mlrd teńge jumsaldy
PETROPAVL. QazAqparat – Soltústik Qazaqstan oblysynda bıyl medıtsınalyq qondyrǵylardy jańalaýǵa jyldaǵydan 3 ese artyq qarajat bólinip, 4 mlrd teńge jumsaldy, dep habarlaıdy QazAqparat tilshisi.
SQO ákimi Qumar Aqsaqalov BAQ ókilderimen kezdesip, jyl boıy atqarylǵan jumystardy qorytyndylady, keler jyldyń josparlarymen bólisti.
Bıyl óńirdiń emdeý mekemelerine zamanaýı tsıfrlyq mammograf, kompıýterlik tomograf, magnıtti rezonansty tomograf, angıograf pen sońǵy úlgidegi rentgender satyp alyndy. Qymbat qondyrǵylarmen aýdandyq aýrýhanalar jabdyqtala bastady. Bul qondyrǵylar dertti erte bastan jáne sapaly anyqtaýǵa múmkindik bermek.
Máselen onkologııalyq ortalyqta ornalasqan tsıfrlyq mammograf qaterli isikti 0 satyda anyqtaıdy. Bıyl bul qondyrǵymen 10 myńnan astam zertteý júrgizilgen. Al kompıýterlik tomografta 1776 zertteý jasalǵan eken.
Tsıfrlyq angıograf júrek aqaýyn anyqtaýda taptyrmas qural. Al MRT-nyń arqasynda ınsýltti erte bastan anyqtaýǵa múmkindik bar.
«Qańtar aıynan bastap MRT men KT-ny turǵyndar tegin jasatqyza alady. Bul MÁMS aıasynda múmkin bolmaq. Buryn turǵyndar tekseristen ótý úshin 6 myń teńgeden 20 myń teńgege deıin tóleıtin», - deıdi oblys ákimi Qumar Aqsaqalov.
Bıyl emdeý mekemelerine 66 arnaıy Mercedes kóligi alyndy. Jaqynda taǵy 30 Hyundai reanımobıli kelmek. Olardyń barlyǵy qajetti quraldarmen tolyq jabdyqtalǵan. Byltyr oblysqa tek 1 ǵana reanımobıl ákelinse, sońǵy ret kóp mólsherde - 30 dana 2015 jyly alynǵan.
«Densaýlyq saqtaý salasyna jumsalyp jatqan qarajat bizdiń turǵyndarymyzdyń sapaly medıtsınalyq kómek izdep shetelge shyǵýyn azaıtady. Petropavl qalasynda kóp salaly aýrýhana salynyp jatyr. Bul kerisinshe, sheteldik azamattardyń bizdiń óńirge kelip emdelýine jol ashpaq. Óıtkeni kórsetiletin medıtsınalyq kómektiń sapasyn halyqaralyq deńgeıge jetkizbekshimiz», - dedi Qumar Aqsaqalov.
Al 2020 jyly óńirde joǵary tehnologııalyq qondyrǵylardy alýǵa 2,5 mlrd teńge jumsalmaq.
