SQO-nyń emdeý mekemelerine 54 medıtsınalyq qondyrǵy satyp alynady
PETROPAVL. QazAqparat - Petropavlda medıtsına qyzmetkerleriniń kásibı merekesine arnalǵan saltanatty jıyn ótti. Aq halatty abzal jandardy tól meıramdarymen Soltústik Qazaqstan oblysynyń ákimi Qumar Aqsaqalov quttyqtady, dep habarlaıdy QazAqparat.
Óńir basshysy dárigerlerdiń qoǵamdaǵy erekshe rólin atap ótti. Oblystyń emdeý mekemelerinde isine berik kásibı mamandar jeterlik. Qumar Aqsaqalov jas mamandarǵa úlgi bolarlyq dárigerlerdiń esimderin atady. Olar - oblystyq balalar aýrýhanasynyń jansaqtaý bólimshesin 30 jyl basqaryp kele jatqan Nurlan Jaqypov, joǵary sanatty synyqshy Nıkos Leonov, joǵary sanatty hırýrg-onkolog Málik Seksembaev jáne taǵy basqalar.
SQO ákimdiginiń baspasóz qyzmetinen málim etkendeı, aımaqta medıtsına salasyna erekshe kóńil bólinip keledi. Máselen, bıyl 38 avtokólik pen 54 medıtsınalyq qondyrǵy satyp alý kózdelgen. 15-ke jýyq densaýlyq saqtaý ǵımaraty jóndeýden ótetin bolady.
«Petropavlda kópsalaly aýrýhana salýdy kózdep otyrmyz. Mekeme 700 orynǵa shaqtalmaq. Aýrýhanada emdeýdiń barlyq túrleri kórsetiledi. Zamanaýı aýrýhananyń qurylysy kelesi jyly bastalady. «Bereke» yqshamaýdanynda da emhana salý josparda bar», - dedi Qumar Aqsaqalov.
Saltanatty jıyndauzaq jylǵy adal eńbegi, oblystyń densaýlyq saqtaý júıesin damytýǵa qosqan zor úlesi úshin medıtsına qyzmetkerleri «Qazaqstan Respýblıkasynyń densaýlyq saqtaý isiniń úzdigi» jáne «Densaýlyq saqtaý isine qosqan úlesi úshin» tós belgilerimen, sondaı-aq oblys ákiminiń qurmet gramotalarymen jáne alǵys hattarymen marapattaldy.
