SQO-nyń emdeý mekemelerine 20 ottegi kontsentratory taratyldy
PETROPAVL. QazAqparat – Petropavldyń emdeý mekemelerine «DAULETTEN qaıyrymdylyq qory» jáne «BI Group» qurylys kompanııasynyń aqshasyna alynǵan 20 ottegi kontsentratory jetkizildi, dep habarlaıdy QazAqparat.
Medıtsınalyq apparattardyń ony Petropavldaǵy kópsalaly aýrýhanaǵa berildi.
«Jaqsylyq vırýsy» aktsııasy aıasynda «DAULETTEN qaıyrymdylyq qory» jáne «BI Group» qurylys kompanııasynyń janynan qurylǵan «Birlik» qorynyń qarjysyna alynǵan 20 ottegi kontsentratory jetkizildi. Ony oblys ortalyǵyna tasymaldaýshy kompanııalardyń biri tegin jetkizip berdi. Jalpy biz buǵan deıin «Meniń atamekenim» aktsııasy aıasynda óńirdiń emdeý mekemelerine kómektesken edik», - deıdi Soltústik Qazaqstan oblystyq kásipkerler palatasynyń dırektory Arman Orazǵulov.
Petropavl qalalyq kópsalaly aýrýhana bas dárigeriniń orynbasary Rýslan Tasovtyń aıtýynsha, emdeý mekemelerinde bul qondyrǵylarǵa qajettilik bar. Ottegi kontsentratorlary 3 qalalyq aýrýhanada ashylǵan provızorlyq statsıonarǵa beriledi jáne jaqyn arada naýqastardy emdeýge qoldanylmaq.
Qalǵan 10 apparat Aıyrtaý, Aqjar, Qyzyljar, Jambyl jáne Maǵjan Jumabaev aýdandaryndaǵy ortalyq aýrýhanalarǵa jóneltiledi.
Buǵan deıin «Jaqsylyq vırýsy» aktsııasy arqyly Petropavlǵa «DAULETTEN Qaıyrymdylyq qorynyń» qarjysyna eki ottegi kontsentratory jetkizildi. Uıymdastyrýshylardyń aıtýynsha, aktsııaǵa kez-kelgen adam qatysyp, qarjylaı qoldaýdan basqa, ónimdi jetkizý nemese óz taýaryna jeńildik berý arqyly, tipti volonter retinde de kómek kórsete alady.
Jobaǵa qatysý úshin qajet aqparatty atamekenim.kz saıtynan alýǵa bolady.
