SQO-nyń eki aýdanynda jańa sport nysandary paıdalanýǵa berildi
PETROPAVL. QazAqparat – Soltústik Qazaqstan oblysynda jańadan salynǵan hokkeı korty men sporttyq-saýyqtyrý ortalyǵy paıdalanýǵa berildi, dep habarlaıdy QazAqparat tilshisi.
SQO ákimi baspasóz qyzmetiniń málimetinshe, Ǵabıt Músirepov aýdanynda «Sunqar» atty jańa hokkeı korty ashyldy. Jańa sport nysanynyń jumysyn óńir basshysy Qumar Aqsaqalov baryp kórdi.
Byltyr oblys ákimi ár aýdanda jabyq hokkeı korttarynyń salynatyndyǵyn aıtqan edi. Bul bastama nátıjeli júzege asyp jatyr. Qazir olardyń sany segizge jetti.
«Ár aýdanda stadıon janynan hokkeı korty, sport kesheni salyný kerek. Osylaısha «kishi olımpıada aýylyna» aınalady. Kelesi jyly bul keshenderde fýtbol, hokkeı, basketbol jáne voleıboldan turaqty chempıonattar ótkizetin bolamyz. Bıyl aýdandarda 6 sporttyq-saýyqtyrý kesheniniń qurylysy júrip jatyr. Bul nysandarda dástúrli túrde sport jarystary ótkiziletin bolady», - deıdi Qumar Aqsaqalov.
Ǵ.Músirepov aýdanynyń ortalyǵy Novoıshımkada paıdalanýǵa berilgen jabyq hokkeı kortynyń qurylysyna 72 mln teńge jumsaldy. Bul jerde sportshylar ǵana sheberlikterin shyńdap qoımaı, balalar men jastar da jattyǵa alady. Jas sportshylardy daıyndaý úshin qolaıly jaǵdaı jasalǵan.
«Bıyl 5 aýdan ortalyǵynda hokkeı korttary salynyp jatyr. Jyl sońyna deıin Mamlıýtkada ashylady. Qańtar aıynda Býlaev pen Tımırıazevte hokkeı korttary qoldanysqa beriledi. 2021 jyly bıýdjet esebinen taǵy 7 hokkeı korty salynady», - deıdi óńir basshysy.
Al búgin Taıynsha aýdanynda dene shynyqtyrý-saýyqtyrý kesheni paıdalanýǵa berildi. Sport ortalyǵynda boks, kúres, aýyr atletıka, fýtbol, basketbol jáne voleıbol zaldary bar. Oıyn barysyn 160 adam tamashalaı alady.
