SQO-nyń burynǵy ákimi Erik Sultanov senatorlyqtan úmitti
ASTANA. QazAqparat - QR Parlamenti Senatyna depýtattyǵyna úmitker 52 kandıdat tirkeldi. Bul týraly búgin QR OSK Saılaý protsesin uıymdastyrý bóliminiń meńgerýshisi Maqsathan Anapın málim etti, dep habarlaıdy QazAqparat.
«Oblystyq, Astana jáne Almaty saılaý komıssııalarynda QR Parlamenti Senaty depýtattarynyń 16 mandatyna usynylǵan 89 úmitkerdiń 52-si tirkelgen. Salystyra aıtsaq, 2011 jyly bul san 52, 2014 jyly 53 kandıdatty quraǵan bolatyn. Tirkelgen kandıdattardyń ishinde 47-si er adam jáne 5-eýi áıel. Salystyrmaly túrde aıtar bolsam, burynǵy ótken saılaýlarda áıelder sany tómen edi. 2011 jyly - 1, 2014 jyly 2 áıel bolǵan. Kandıdattardyń ortasha jasy - 51,5», - dedi ol.
Onyń atap ótýinshe, úmitkerlerdiń 4-eýi Senattyń qazirgi depýtaty, 3-eýi maslıhat depýtaty, 15-i memlekettik uıymdardyń, kásiporyndardyń jáne mekemelerdiń qyzmetkerleri, 11-i memlekettik qyzmetshiler, 16-sy kommertsııalyq qurylymdardyń qyzmetkerleri, úsheýi basqa jumystarda isteıdi.
«Mamandyǵy boıynsha 16 ınjener, 11 eonomıst, 6 oqytýshy, 6 zańger, 7 aýyl sharýashylyǵy qyzmetkeri, 3 dáriger, 1 saıasattanýshy, jáne 2 basqa mamandyq ıesi bar. Kóptegen kandıdat birneshe mamandyqtyń ıesi. Tirkelgen kandıdattardyń basym kópshiligi Soltústik Qazaqstan oblysynda - 5 kandıdat. Aqmola oblysy men Astana qalasynda 4 úmitkerden, qalǵan óńirlerde úsh kandıdattan tirkelgen», - dedi Anapın.
Máselen, onyń dereginshe, SQO-dan tirkelgenderdiń qatarynda óńirdiń burynǵy basshysy Erik Sultanov ta bar. Al Astana qalasynan Edil Mamytbekov, Dáýlet Sútegenov, Damır Núrpeıisov, Nadejda Mırba senatorlyqtan úmitker bolyp otyr.
