SQO-nyń birneshe aýdanynda sý tasqyny bolýy yqtımal
PETROPAVL. QazAqparat - Soltústik Qazaqstan oblysynyń qutqarýshylary kóktemgi sý tasqyndaryna erte bastan daıyndalý qajettigin eskertedi, dep habarlaıdy QazAqparat tilshisi.
Óńirdiń Tótenshe jaǵdaılar departamenti baspasóz qyzmetiniń aqparatyna súıensek, sáýirdiń alǵashqy on kúndiginde sý tasqyndary bastalýy múmkin. Oblystaǵy sý tasqyndaryna qar men muzdyń kúrt erýi sebep bolady. Sý aıdyndaryndaǵy muz erip, seń júre bastaıdy.
Petropavlda jer betindegi qar men muzdardyń erýinen: Podgora, Qopaı, Teri zaýyty, Jumysshylar kenti, Benzostroı, Zarechnyı kenti sekildi birneshe shaǵyn aýdanda sý tasqyndary bolýy múmkin. Zarechnyıǵa tipti Esildiń sýy tasýy da múmkin.
«Kóktemdegi sý aǵyndaryna kóp nárse baılanysty. Biraq úıleri eńiste ornalasqan jeke sektordyń turǵyndary sý tasqynynan qutyla almaıdy-aý. Qazirdiń ózinde aýlasyn, úıdiń mańaıyn qardan tazalaı berýi tıis. Sýdyń aryqtarmen, jylǵalarmen kedergisiz aǵyp ketýin qadaǵalaýdyń máni zor. Qar, muz, qoqystar sýdyń jolyn bógese, aınalaǵa jaıylyp ketedi», - deıdi baspasóz qyzmetiniń ókilderi.
Sý tasqyny baıqalatyn aýdandarda 1 myń jeke ýchaskeler bar. Sý tasqyny kezinde olar «syrtqy álemnen» úzilip qalýy da múmkin. Tasyǵan sýdyń ústine elektr jáne baılanys symdarynyń túsý qaýpi de joq emes. Qutqarýshylar mundaı jaǵdaılar alapat sý tasqyndaryna ǵana tán ekenin aıtyp, sendirýde. Sońǵy jyldary ondaı apattardyń bolmaǵany kóńilge demeý bolyp otyr.
Avtory: Olesıa Jýkoven
