SQO-nyń bas sanıtarlyq dárigeri turǵyndardy merekeni úıde otbasymen qarsy alýǵa shaqyrdy

PETROPAVL. QazAqparat – Soltústik Qazaqstan oblysynyń bas sanıtarlyq dárigeri brıfıngide koronavırýs boıynsha óńirdegi jaǵdaıǵa toqtaldy, dep habarlaıdy QazAqparat tilshisi.

SQO-nyń bas sanıtarlyq dárigeri Arman Kúshbasovtyń aıtýynsha, ótken aptamen salystyrǵanda KVI juqtyrýshylar sany 5 % azaıǵan. Máselen ótken táýlikte óńirde COVID-19 juqtyrýdyń 58 jaǵdaıy tirkelgen. Aýyrǵandardyń basym bóligi Petropavlǵa tıesili.

«Basqa óńirlermen salystyrǵanda jaǵdaı turaqtalyp keledi. SQO «sary aımaqqa» kirgen. Biraq ta bul kórsetkish siz ben bizge baılanysty, kez kelgen ýaqytta ózgerip ketýi múmkin. Sol sebepti jańa jyl merekesin úıde, otbasy múshelerimen qarsy alýǵa shaqyramyn. Baılanysty neǵurlym azaıtqan durys. Sondaı-aq qoldy jıi jýyp, áleýmettik ara qashyqtyqty saqtaýdy, maska taǵyp júrýdi umytpaımyz», - deıdi Arman Kúshbasov.

Bul kúnderi Petropavlda syrǵanaqtar jumys isteıdi. Muz aıdyndary da ashyq bolady. Alaıda mamandardyń talaptaryn esten shyǵarmaǵan jón.

«Monıtorıngtik toptar jumysyn jalǵastyrady. Olardyń mindeti jurtty jazalaý emes, eskertý, aýrýdyń taralýyna jol bermeý. Alaıda talapty óreskel buzǵan jaǵdaıda ákimshilik jaýapqa tartýǵa týra keledi. Ol qoǵamdyq oryndarǵa da, syrǵanaq tebýshilerge de qatysty. Muz aıdyndaryn jappaımyz, alaıda konkıdi jalǵa berý jumys istemeıdi. Óıtkeni ınfektsııa aıaq kıim arqyly juǵýy múmkin», - deıdi oblystyń bas sanıtarııalyq dárigeri.

Jalpy karantın bastalǵaly SQO-da ákimshilik quqyqbuzýshylyqqa qatysty 1706 hattama toltyryldy. Onyń 1573-i jeke tulǵalarǵa, 131-i kásipkerlik sýbektilerine jáne ekeýi laýazymdy tulǵalarǵa qatysty. Aıyppuldyń mólsheri 94,5 mln teńgege jetti.