SQO-nyń bas sanıtar dárigeri monıtorıngtik toptardyń jumysyn synǵa aldy

PETROPAVL. QazAqparat – Soltústik Qazaqstan oblysynda monıtorıngtik toptar belsendilikti tómendetip jibergen, keı aýdandarda aı boıy birde bir reıd uıymdastyrmaǵan, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, oblysta qazan aıynda nebary 188 reıd júrgizilip, 1118 nysan qamtylǵan. Talapty buzǵan 30 tulǵaǵa 1,6 mln teńge aıyppul salyndy.

«Tımırıazev jáne Ýálıhanov aýdandarynda reıdter múldem júrgizilgen joq, Aqjar aýdanynda 20 nysandy qamtyǵan tek 3 reıd, Aıyrtaý aýdanynda 26 nysandy teksergen 5 reıd, Shalaqyn aýdanynda jáne Taıynsha aýdanynda 9 reıd júrgizildi. Keı aýdandarda reıdterden nátıje joq, 1-2 zań buzýshylyq qana tirkelgen. Algorıtmniń bolýyna qaramastan, Aqqaıyń, Mamlıýt, Maǵjan Jumabaev jáne Qyzyljar aýdandaryn qospaǵanda, monıtorıngtik toptar vaktsınatsııany tekserý boıynsha reıdter ótkizbeıdi», - deıdi Áset Jumataev.

SQO-da qazir Ashyq jobasyna 2886 nysan qatysyp jatyr. Olardyń 98-inde zańbuzýshylyqtar anyqtalǵan.

«Ashyq arqyly «Sary» mártebesi anyqtalǵan turǵyndarǵa qatysty sanıtarııalyq-epıdemııaǵa qarsy jáne sanıtarııalyq-profılaktıkalyq is-sharalar júrgizý týraly 125 qaýly shyǵaryldy. «Qyzyl» mártebesi bar oqshaýlaý rejımin buzǵan 109 adam ákimshilik jaýapqa tartyldy. Respýblıkasynyń basqa óńirlerinde turatyn, alaıda SQO aýmaǵyndaǵy nysandarǵa barý arqyly anyqtalǵan 28 adamǵa materıaldar jınalyp, sharalar qabyldaý úshin turǵylyqty jerine jiberildi», - deıdi departament basshysy.

Jalpy úı karantınin buzýshylardyń 73-i – 74 %-y Petropavl turǵyndary.

Buǵan deıin óńirdegi epıdahýaldyń nasharlaýyna baılanysty óńir basshysy Qumar Aqsaqalov turǵyndardy vaktsına alýǵa shaqyryp, úndeý jasaǵan edi.