SQO-nyń alǵy shepte júrgen dárigerleri eńbeginiń elengenine razy
PETROPAVL. QazAqparat – Soltústik Qazaqstan oblysynda SOVID-19 vırýsymen kúreske tartylǵan medıtsına qyzmetkerleri eńbekaqysyna qosymsha ústemeaqy alyp, kórsetilip jatqan qoldaý úshin Memleket basshysyna alǵys aıtýda, dep habarlaıdy QazAqparat tilshisi.
Petropavldaǵy jedel járdem qyzmetine 60 adam kúndelikti kezekshilikke túsedi. Olardyń jumysy on eki saǵatqa shaqtalǵan, keıde táýlik boıy da shaqyrtýǵa shyǵyp jatady. Al elde tótenshe jaǵdaı jarııalanyp, oblys ortalyǵynda karantın engizilgeli mamandardyń jumysy arta túsken.
Petropavl qalasyndaǵy jedel járdem qyzmeti «Densaýlyq» ortalyǵynyń feldsheri Jandos Zaǵypardyń aıtýynsha, ol bir kezekshilikte eń kemi on shaqyrtýǵa barady. Jas maman jumysyn adal atqarady, óıtkeni bul – súıip-tańdaǵan mamandyǵy.
«24 naýryz kúni óńirde koronavırýs ınfektsııasyn juqtyrǵan alǵashqy syrqat anyqtalǵannan beri kúsheıtilgen rejımde jumys istep jatyrmyz. 24-31 naýryz aralyǵy úshin bizdiń eńbekaqymyzǵa qosymsha ústeme aqy berildi. Buǵan biz árıne qýanyshtymyz. Eńbegimizdi elegeni úshin Memleket basshysyna alǵysymyz sheksiz. Koronavırýs indetimen ári qaraı kúreske óz úlesimizdi qosýǵa árdaıym daıynbyz», - deıdi jedel járdem qyzmetiniń feldsheri.
Ǵalııa Jolamanova - Petropavldaǵy № 1 qalalyq aýrýhanasynyń juqpaly aýrýlar bólimshesiniń meıirbıkesi. ıAǵnı koronavırýs indetin juqtyrǵan naýqastarmen tikeleı baılanysta jumys isteıdi. Oblysta qaýipti indet anyqtalǵaly otbasyn kórmepti. Kezekshilikten keıin birden meımanhanaǵa jetkiziledi. Ol jerde dárigerler úshin barlyq jaǵdaı jasalǵan.
«Balalarym bar. Árıne, saǵynamyn. Biraq, olardyń qaýipsizdigi úshin shydaý qajet. Prezıdenttiń bizge aı saıyn ústemeaqy berý týraly qaýlysyn qýanyshpen qarsy aldy. Bólimshemizdiń barlyq medıtsınalyq qyzmetkerleriniń atynan bizge kórsetilip jatqan qoldaý úshin alǵys aıtamyn», - deıdi Ǵalııa Jolamanova.
Jedel járdem qyzmetiniń dárigerleri de, juqpaly aýrýlar bólimshesiniń medıtsınalyq qyzmetkerleri de óte joǵary qaýip tobyna kirgen. Buǵan deıin oblysta 459 mamannyń naýryz aıy úshin 43,9 mln teńge ústemeaqy alǵanyn aıtqan edik.
