SQO-nyń Ádep keńesi ákimdiktiń bólim basshysyn jumystan bosatýdy usyndy

PETROPAVL. QazAqparat – Petropavlda kólikke mas kúıde otyrǵany úshin dene shynyqtyrý jáne sport bóliminiń basshysyn jumystan qýý usynyldy, dep habarlaıdy QazAqparat tilshisi.

Soltústik Qazaqstan oblysynyń Ádep jónindegi keńesi Petropavl qalalyq ákimdiginiń dene shynyqtyrý jáne sport bóliminiń jetekshisine qatysty isti qarady.

Memlekettik qyzmet isteri boıynsha departamenti baspasóz qyzmetiniń málimetinshe, memlekettik qyzmetshi 2020 jyldyń 17 jeltoqsany kúni kólikti mas kúıde júrgizgen. Sottyń úkimimen ol 15 táýlikke qamaýǵa alynyp, 7 jylǵa kólik basqarý quqyǵynan aıyryldy.

Zań boıynsha memlekettik qyzmetshiler ákimshilik quqyqbuzýshylyqqa jol bermeýi qajet jáne mindetti túrde qyzmettik ádepti saqtaýy kerek.

Tártiptik isti qaraǵan Ádep boıynsha keńes bólim basshysyn jumysynan bosatýǵa usynys jasady.