SQO-nyń 9 aýdanynda turmystyq qatty qaldyqtar polıgony salynady
PETROPAVL. QazAqparat – Soltústik Qazaqstan oblysynyń 9 aýdanynda turmystyq qatty qaldyqtar polıgonynyń qurylysy bastalmaq, dep habarlaıdy QazAqparat tilshisi.
«Qoqys polıgondaryna kelsek, josparǵa saı aýdandarda 9 turmystyq qatty qaldyqtar polıgonyn salý kózdelgen, 2023 jylǵa deıin aıaqtaýymyz qajet. Olar aýdandarda salynady, qajetti smetalyq qujattar jasaldy, búginde saraptamadan ótip jatyr. Qarajat bólingen jaǵdaıda iske kirisemiz», - deıdi SQO ekologııa departamentiniń basshysy Azamat Bektasov.
Aıtýynsha, 2020 jyly óńirdegi ekologııalyq máselelerdi sheshý boıynsha keshendi jol kartasy ázirlendi. Bul kartany ekologııa mınıstrligi jáne SQO ákimdigi bekitken. Qujat 7 baǵyt, 15 is-sharadan turady. Olardyń qatarynda turmystyq qatty qaldyqtar polıgonyn salýdan bólek, aýany lastaıtyn zattardyń kólemin azaıtý, káriz júıelerin qalpyna keltirý, kógaldandyrý máseleleri qamtylǵan.
SQO-da qazirgi ýaqytta qoqys tógetin 454 jer bar, onyń 15-i ǵana zańdy. Tek 333-i ǵana memlekettik jer aktisine ıe. «Qazaqstan ǵarysh sapary» arqyly bıyl 80 qoqys úıindisi anyqtaldy. Byltyr 363-i anyqtalǵan edi. Qazirgi ýaqytta jergilikti atqarýshy organdardyń kúshimen zańsyz qoqys oryndary joıylyp jatyr.
Al, Petropavl qalasyndaǵy polıgonnyń ruqsat qujaty 2024 jyly kúshin joıady. Ári qaraı jumys isteýi úshin ony sozdyrýy kerek.
«Qazirgi jaǵdaıda bul nysan tıisti ruqsatty ala almaıdy. Óıtkeni, polıgon sanıtarııalyq jáne ekologııalyq talaptarǵa saı kelmeıdi. Polıgonda qaldyqtardyń janýyna baılanysty kóptegen shaǵymdar túsip jatyr. Olar durys saqtalmaıdy. Ákelingen qaldyq suryptalýy qajet, keıin kómilýi kerek. Budan basqa da máseleleri jetkilikti. Kóktemde biz tekserdik. Birqatar zańbuzýshylyqtar ashyldy. Olar boıynsha ákimshilik jaýapkershilikke tartyldy. Joıý jóninde usynym berildi. Biraq, polıgon turmystyq qatty qaldyqtardy kómýdi qolǵa alǵan joq. Sondyqtan, materıaldardy sotqa jiberdik. Maqsatymyz – olqylyqty joıǵanǵa deıin polıgon jumysyn toqtatý», - deıdi departament basshysy.
Mamannyń aıtýynsha, Petropavldaǵy turmystyq qatty qaldyqtar máselesin sheshý úshin jer bólip, jańa polıgon salý qajet.
