SQO-nyń 300-den astam mektebinde «Balaqaılar mektebi» jumysyn bastady
PETROPAVL. QazAqparat – Soltústik Qazaqstan oblysynda «Balaqaılar mektebi» atty eki aptalyq mektepaldy daıarlyq kýrstary bastaldy, dep habarlaıdy QazAqparat tilshisi.
SQO Bilim basqarmasy baspasóz qyzmetiniń málimetinshe, «Balaqaılar mektebi» oblystyń 306 mektebinde uıymdastyrylǵan. 2 795 búldirshindi qamtyp, olarǵan 348 muǵalim sabaq beredi. Mektep tabaldyryǵyn alǵash attaıtyn balalar eki apta boıy oqýǵa beıimdeledi.
«Daıyndyq kýrstarynyń maqsaty - balalardy bastaýysh mektepte oqýǵa daıyndaý. Balabaqshadan keıin ár balaǵa mekteptiń tártibine kóndigý ońaı emes. Al balabaqshaǵa, shaǵyn ortalyqqa barmaǵan búldirshinderge birden partaǵa otyrý tipten qıyn. Sol sebepti mektebimizde daıyndyq oqý toptary quryldy. Munda balalar árip tanıdy, mátindermen jumys isteımiz, tsıfrlardy úırenemiz. Aǵylshyn tilinen sabaqtar júrgiziledi», - deıdi «BEST gımnazııasy» KMM bastaýysh synyp muǵalimi Ramılıa Álimova.
Daıarlyq kýrsynan bala sýret boıynsha áńgime qurastyrýdy úırenip, áńgime, ertegilerdi qaıtalaýdy, sózderge dybystyq taldaý jasaýdy, beıneleý quraldaryn qoldanýdy úırenip shyǵady.
Jalpy SQO boıynsha jańa oqý jylynda 73,5 myń bala mektepke barady, onyń 8 myńnan astamy – birinshi synyp oqýshylary.
Sondaı-aq 9-22 tamyz aralyǵynda oblys mektepterinde 2-11 synyp oqýshylary úshin «Jazǵy mektep» óz jumysyn bastady.
Mamandardyń aıtýynsha, «Jazǵy mektep» - qashyqtan oqý kezinde negizgi pánder boıynsha bilimde jiberilgen olqylyqtardyń ornyn toltyrý, úlgerimi nashar oqýshylarǵa kúrdeli taqyryptardy ıgerýde kómek kórsetý maqsatynda uıymdastyryldy. Jazǵy mekteptiń birinshi kúni sabaqqa 12 myńǵa jýyq oqýshy keldi. Ótinishter qabyldaý áli jalǵasady.
