SQO-ny damytýǵa úsh jylda 325 mlrd teńge jumsalady
PETROPAVL. QazAqparat – Soltústik Qazaqstan oblysyn áleýmettik-ekonomıkalyq damytýdyń keshendi jospary óz nátıjesin bere bastady, dep habarlaıdy QazAqparat tilshisi.
Soltústik Qazaqstan oblysyn damytýǵa baǵyttalǵan keshendi jospardyń oryndalýy oblystyq ákimdiktiń otyrysynda qaraldy. 2018-2021 jyldarǵa josparlanǵan baǵdarlama ekonomıkanyń barlyq salalaryn qamtyǵan. Olardyń ishinde ınvestjobalardy júzege asyrý, áleýmettik nysandardy jóndeý jáne jańadan salý, kólik jáne ınjenerlik kommýnıkatsııalardy damytý bar. Úsh jyldyń ishinde 48 is-shara júzege asýy tıis. Osy aralyqta óńirdi damytýǵa shamamen 325 mlrd teńge jumsalmaq. Bıyl jospar aıasynda júıeli máselelerdi sheshýge 92 mlrd teńge bólindi.
SQO ákimi baspasóz qyzmetiniń málimetinshe, qazir zaýyttardyń qondyrǵylary jańartylýda. «Petropavl aýyr mashına jasaý zaýyty» AQ jáne «Kırov atyndaǵy zaýyt» AQ tehnologııalyq jańǵyrtý úshin byltyr respýblıkalyq qazynadan 3,3 mlrd teńge, bıyl 1,5 mlrd teńge bólindi. Nátıjesinde shyǵarylatyn ónim kólemi 250 mlrd teńgeden 350 mlrd teńgege deıin jetpek.
Densaýlyq saqtaý uıymdaryn medıtsınalyq tehnıkamen qamtýǵa keshendi jospar boıynsha 6 mlrd teńge qarastyrylǵan. Onyń 2 mlrd teńgesine bıyl magnıtti-rezonansty tomograf, kompıýterlik tomograf, angıograf sekildi qymbat qondyrǵylar alyndy.
Sondaı-aq 125 mektep kúrdeli jóndeýden ótip, aýyldarda 420 úı salynyp jatyr. Bul – atqarylýy tıis aýqymdy jumystyń bir bóligi ǵana.
«Bizge oblysymyzdy damytý úshin keshendi túrde jumys qajet boldy. Bul zaýyttardy jańǵyrtý, áleýmettik nysandar men joldardy jóndeý, úılerdiń qurylysy. Ár sala boıynsha jekelegen sheshim qabyldasaq, tıisti nátıje bolmas edi. Keshendi jumystyń arqasynda oblystyń áleýmettik-ekonomıkalyq damýyn qamtamasyz ettik», - dedi óńir basshysy Qumar Aqsaqalov.
