SQO-nyń úsh aýdanynda ǵana turmystyq qaldyqtar shıkizat retinde iske jaratylyp jatyr

Qoldanystaǵy polıgondardy zańdastyrýdan bólek jańa qoqys oryndaryn jaraqtandyrý máselesi de sheshilip jatyr.

SQO tabıǵı resýrstar jáne tabıǵat paıdalanýdy retteý basqarmasynyń málimetinshe, Jambyl aýdanynyń Presnovka aýylynda jańa polıgon qurylysyna qajetti qujattar ázirlense, Maǵjan Jumabaev aýdanynyń Býlaevo qalasynda polıgon salýǵa jobalyq-smetalyq qujattama daıyndalyp, memlekettik saraptamadan ótti.

Petropavldaǵy jabylýy tıis qoqys polıgonyn paıdalaný merzimi keler jyldyń sońyna deıin uzartyldy. 

Jańa turmystyq qaldyqtar polıgonyn Mamlıýtka tasjolynyń boıynda ornalastyrý josparlanǵan. Bul maqsatqa arnaıy jer telimi bólinip, jobalyq qujattar ázirlendi jáne bıyl 29 sáýirde oń qorytyndy alyndy.

Mamandardyń aıtýynsha, qatty qaldyqtardy qaıta óńdeý kórsetkishteri de artyp keledi. Osy jyldyń birinshi toqsanynyń qorytyndysy boıynsha turmystyq qatty qaldyqtardy qaıta óńdeý jáne kádege jaratý deńgeıi 31,5% jetken. Bul ótken jyldyń sáıkes kezeńimen salystyrǵanda 8% joǵary.

Osy maqsatta Petropavlda plastık bótelkelerdi, áınekti, kartondy jáne metall qaldyqtaryn bólek jınaýǵa arnalǵan 40 arnaıy konteıner ornatylǵan. Sonymen qatar turǵyndardan makýlatýrany qabyldaý úshin 50 ekoboks qoıylǵan. Qala aýmaǵynda qaıta óńdeýge jaramdy shıkizatty qabyldaıtyn alty turaqty qabyldaý pýnkti jumys isteıdi. Bul jumystardy «Radýga» jaýapkershiligi shekteýli seriktestigi júzege asyryp keledi.

Desek te qaldyqtardy jınaý jáne qaıta óńdeý isi oblys ortalyǵynan bólek taǵy úsh aýdanda — Qyzyljar, Mamlıýt jáne Taıynsha aýdandarynyń ortalyqtarynda qolǵa alynǵan.

Turmystyq qaldyqtardy ýaqytyly shyǵarý ásirese jaz ýaqytynda ózekti. Búginde Petropavlda halyqqa qyzmet kórsetetin bes qoqys shyǵarý uıymy jáne zańdy tulǵalarǵa qyzmet kórsetetin taǵy úsh kásiporyn jumys isteıdi.

Buǵan deıin Qazaqstanda jyl basynan beri 884 zańsyz qoqys polıgony anyqtalǵanyn jazǵan edik.