SQO-nyń tórt aýylynda brýtsellez anyqtalyp, shekteý sharalary engizildi

Soltústik Qazaqstan oblysynyń 4 aýylynda iri qara maldan brýtsellez anyqtalyp, veterınarlar bul eldi mekenderge shekteý sharalaryn engizdi, dep habarlaıdy Kazinform.

SQO veterınarııa basqarmasy baspasóz qyzmetiniń málimetinshe, brýtsellezge 3 aýdannyń 4 aýylyndaǵy mal shaldyqqan, atap aıtqanda Qyzyljar aýdanyndaǵy Ploskoe, Aqqaıyń aýdanyndaǵy Lenınskoe jáne Aqjar aýdanyndaǵy Úlgili men Tuǵyrjap aýyldarynda anyqtalyp otyr.

«Sońǵy derek qarashanyń 13-i kúni Aqjar aýdany Tuǵyrjap aýylyndaǵy «Hıýa» sharýa qojalyǵynda tirkeldi. Brýtsellez aýrýy 5 iri qara maldan anyqtaldy. Barlyq mal soıyldy. Qazirgi ýaqytta eldi mekennen et jáne sút ónimderin syrtqa shyǵarýǵa shekteý qoıylǵan», - deıdi SQO veterınarııa basqarmasynyń baspasóz hatshysy Amanjol Nurtazın.

Mamandardyń aıtýynsha, jyl basynan beri óńirde 223 iri qaradan brýtsellez anyqtalsa, ótken jyly aýyrǵan 779 mal pyshaqqa ilikti. 

«Bıyl Aıyrtaý aýdanynda – 19, Aqjar aýdanynda - 76, Aqqaıyń aýdanynda - 98, Qyzyljar aýdanynda – 23, Ýálıhanov aýdanynda – 7 bas aýrý iri qara mal joıyldy. Qazirgi ýaqytta brýtsellezben kúrestiń negizgi joly – ony der kezinde anyqtap, aýrý maldy oqshaýlap, kózin joıý. Bul qaýipti dert, aýrý maldan adamǵa juǵýy múmkin. Brýtsellez juqtyrǵan mal ish tastaıdy, tóli óli týýy múmkin. Aýyrǵany kóp jaǵdaıda bilinbeıdi. Bul dertpen tórt túliktiń bári aýyrǵanymen, ol ásirese qoı eshki, sıyr-shoshqa arasynda jıi taralady», - deıdi Amanjol Nurtazın.