SQO-nyń Taıynsha qalasynda qutyrmaǵa baılanysty shekteý engizilgen
PETROPAVL. KAZINFORM — Soltústik Qazaqstan oblysynda bıyl brýtsellez jáne qutyrma aýrýlaryna qatysty úsh eldi mekenge shekteý sharalary qoldanyldy.
Veterınarııalyq baqylaý jáne qadaǵalaý komıtetiniń SQO aýmaqtyq ınspektsııasynyń málimetinshe, Taıynsha qalasynda qutyrma aýrýy mysyqtan anyqtalǵan. Osyǵan oraı 16 maýsymda Taıynsha qalasy ákiminiń sheshimi negizinde eldi mekenge shekteý sharalary engizildi.
Qutyrma aýrýynyń taǵy bir oshaǵy Esil aýdanynyń Amangeldi aýylynda bıyl anyqtaldy. 5 naýryzda qaýipti ınfektsııanyń taralýyna jol bermeý maqsatynda eldi mekenge tıisti sharalar qoldanyldy.
Veterınarııalyq is-sharalar júrgizilgennen keıin 18 mamyrda barlyq shekteýler alyndy.
Al brýtsellez aýrýy boıynsha Esil aýdanynyń Ilınka aýylynda 3 naýryzda Ilınskıı aýyldyq okrýgi ákiminiń sheshimi negizinde shekteý sharalary engizildi. Tıisti veterınarııalyq-sanıtarııalyq is-sharalardyń nátıjesinde bir aıdan keıin aýrý oshaǵy jabyldy.
Buǵan deıin SQO-da bıyl úsh adam brýtsellez juqtyrǵanyn jazǵan edik.
