SQO-nyń sport mektep-ınternatyndaǵy janjal: tekseris qorytyndysy shyqty

PETROPAVL. KAZINFORM - Soltústik Qazaqstan oblystyq olımpıadalyq rezervtegi mamandandyrylǵan mektep-ınternat-kolledjinde oqýshynyń anasynyń ótinishinen keıin tekseris júrgizildi.

Esterińizge salaıyq, 7 «B» synyp oqýshysynyń anasy Marjan Tajımýratova ulyna 8-synyp oqýshylary tarapynan býllıng jasalyp, dene jaraqaty keltirilgenin málimdedi.

SQO dene shynyqtyrý jáne sport basqarmasynyń málimetinshe, mektep ákimshilik bul máseleni eleýsiz qaldyrmaı, jedel túrde ishki qyzmettik tekseris júrgizip, jaǵdaıdyń barlyq mán-jaıyn jan-jaqty anyqtaý maqsatynda quqyq qorǵaý organdaryna habar berdi.

Quqyq qorǵaý organdary materıal jınaý barysynda anyqtalǵandaı, bıyl mektep-ınternatqa qabyldanǵan 7 «B» synyp oqýshysy K.Janqushev pen jataqhana bólmesinde turatyn 8-synypta oqıtyn birneshe jasóspirim oqýshy arasynda turmystyq sıpatta janjal týǵan. Balalardyń barlyǵy erkin kúres bóliminde oqıdy.

Jınalǵan materıaldar negizinde, quqyq qorǵaý organdary mekeme ákimshiligine QR ÁQBtK-niń 127-baby – «Kámeletke tolmaǵan balany tárbıeleý men oqytý, onyń quqyqtary men qaýipsizdigin qamtamasyz etý jónindegi mindetterdi oryndamaý» boıynsha ákimshilik quqyq buzýshylyq týraly hattama toltyrdy.

- Júrgizilgen tergeý nátıjesinde oqýshyǵa qatysty júıeli túrde býllıng kórsetý, aqsha bopsalaý nemese qoqan-loqy jasaý faktileri rastalǵan joq. Degenmen, mekeme tarapynan bolashaqta mundaı jaǵdaılardy boldyrmaý úshin birqatar naqty profılaktıkalyq jáne uıymdastyrýshylyq sharalar qolǵa alyndy, - delingen SQO dene shynyqtyrý jáne sport basqarmasy bergen jaýapta.

Buǵan deıin SQO olımpıadalyq rezerv mektep-ınternatynda bolǵan jaǵdaıǵa baılanysty Balalardyń quqyqtaryn qorǵaý komıteti birqatar shara qabyldaǵanyn jazǵan edik.