SQO-nyń Shahovskoe aýylynda 14 myńǵa jýyq úı qusy qyrylyp qaldy
PETROPAVL. KAZINFORM — Soltústik Qazaqstan oblysyndaǵy Shahovskoe aýylynda úı qazdary belgisiz aýrýdan qyrylyp jatyr.
Bul týraly turǵyndar áleýmettik jelide jarııalady. Olardyń aıtýynsha, úı qustary qyrkúıek aıynyń basynan aýyryp, óle bastaǵan. Qazir aýyldaǵy qustardyń shamamen úshten biri qyrylǵan. Ázirge qazdardyń neden ólip jatqany belgisiz.
— Meniń qazdarym 8 qyrkúıekten bastap aýyra bastady. Birnesheýi ólip qaldy. Aldymen qaltyraıdy, dene qyzýy kóteriletin shyǵar. Odan keıin ishteri ótedi, nájisi ashyq jasyl tústi.
Dári-dármek satyp alyp berdik, biraq eshqaısy kómektespeı jatyr. Jem jemeı qoıdy, tek qana sý ishedi, — deıdi Shahovskoe aýylynyń turǵyny.
Aýyldyqtardyń kópshiligi qaz ósirýdi kásipke aınaldyrǵan. Sondyqtan keıbir aýlalarda qustardyń sany myńǵa deıin jetedi.
Bul eldi mekende byltyr da kúzde úı qustary jappaı qyrylyp, turǵyndar aıtarlyqtaı shyǵynǵa batqan edi. Byltyr qarasha aıynda 21 otbasynyń 7 myńnan astam úı qusy qyryldy.
Jergilikti veterınarlyq stantsııa mamandary zerthana qorytyndysy boıynsha qustardyń pasterellezden ólgenin málimdedi. Biraq turǵyndar munymen kelispeı, táýelsiz saraptama jasatqan.
— Almatydaǵy Mıkrobıologııa jáne vırýsologııa ǵylymı-óndiristik ortalyǵyna ólgen qazdyń synamasyn jiberdik. Ortalyqtyń táýelsiz saraptama qorytyndysynda qazdan joǵary patogendi N5N1 degen qus tumaýy anyqtalǵany kórsetilgen. Biraq ákimdik te, basqalary da bizdiń táýelsiz saraptamanyń qorytyndysyn qabyldaǵan joq, — degen edi zardap shekkenderdiń biri Janat Ǵabbasov.
SQO veterınarııa basqarmasynyń málimetinshe, Shahovskoe aýylynda úı qustary, sonyń ishinde negizinen qazdar tamyz aıynan bastap ólip jatyr. Osy ýaqytqa deıin 13 869 bas qus qyrylǵan.
Qustardyń neden ólgenin anyqtaý maqsatynda qajetti bıologııalyq jáne patologııalyq materıaldar alynyp, zerthanaǵa joldandy.
— Qazirgi ýaqytta aýylda veterınarııalyq-profılaktıkalyq is-sharalar kesheni júrgizilip jatyr. Qus qyrylǵan aýlalarda dezınfektsııalyq jumystar uıymdastyrylyp, tıisti veterınarııalyq talaptardyń saqtalýy qamtamasyz etilgen.
Al ólgen qus belgilengen veterınarııalyq-sanıtarııalyq talaptarǵa sáıkes mal qorymdaryna jetkizilip, joıyldy, — delingen vedomstvonyń jaýabynda.
