SQO-nyń Novoıshımskoe aýylynda 8 úı sý astynda qaldy

PETROPAVL. KAZINFORM — Soltústik Qazaqstan oblysy Ǵabıt Músirepov aýdany Novoıshımskoe eldi mekenine sý kirip, keı jerlerde bıiktigi 2 metrge deıin jetti. Úılerin sý basqan turǵyndar der kezinde qaýipsiz jerge kóshirildi.

Ǵ.Músirepov atyndaǵy aýdannyń ákimi Rýslan Ańbaevtyń aıtýynsha, aýdan boıynsha jalpy 9 úıge sý kirdi. Onyń 8-i — aýdan ortalyǵy Novoıshımskoe eldi mekeninde, bireýi — Drýjba aýylynda. 

«Úı janýarlary qaýipsiz jerge shyǵaryldy. 50 orynǵa shaqtalǵan evakýatsııalyq pýnkt dene shynyqtyrý-saýyqtyrý oratylyǵynda ornalasqan. Biraq úıin sý basqan turǵyndardyń barlyǵy týǵan-týystaryna ketti. Qazir jaǵdaı turaqtaldy, sý deńgeıi aqyryndap túsip jatyr. Kúndelikti monıtorıng júrgizilip, baqylaýda ustap otyrmyz. Qostanaı jáne Aqmola oblystarynyń bizdiń aýdanmen shekaralas jatqan aýdandarynyń jergilikti atqarýshy bılik ókilderimen baılanys bar. Esil ózeniniń joǵary jaǵynda sý deńgeıi túsip jatyr», — deıdi Rýslan Ańbaev.

Aýdan ákiminiń aıtýynsha, Toqsan bı aýylynyń mańyndaǵy gıdrologııalyq bekette bıylǵy sý deńgeıi 2017 jylǵy kórsetkishten 3 metrge artyp, 15 metrge jetken. 

«Esil ózeniniń jaǵalaýy men sý basqan úıler arasy 100 metr shamasynda. Bul Novoıshımskoe eldi mekenindegi eń tómen ornalasqan jer. Bógetpen qorǵaý tıimsiz, óıtkeni joǵary jaqtan aqqan qarǵyn sý osy jer arqyly ótip Esilge quıylady. Dambamen bekitken jaǵdaıda turǵyndar qarǵyn sýdyń astynda qalady. Ári onyń uzyndyǵy 2,5 km, bıiktigi eń keminde 4 metr bolýy tıis. Qazir úılerin sý basqan turǵyndarmen sóılesip, bul jerde turýdyń qaýipti ekenin túsindirip jatyrmyz. Olarǵa basqa jaqqa kóshýdi usynamyz. Eldi mekenniń baıyrǵy turǵyndarymen de sóılestik. Sońǵy 50-60 jylda mundaı sý tasqyny bolmaǵan eken. 2017 jylǵy sý tasqyny kezinde de sý úılerge jetpegen. Al bıyl ol eń keminde 1,5 metrge kóterildi», — deıdi Rýslan Ańbaev.

Úılerine sý kirgen turǵyndardy kóshirý úshin aýdanda jalpy 30 shaqty evakýatsııalyq beket daıyndaldy.

Olar negizinen bilim, sport nysandarynda ornalasqan. 

Buǵan deıin SQO-da eki aýdannyń 253 turǵyny jáne 19 zańdy tulǵa jaryqsyz qalǵanyn aıtqan edik.

Sondaı-aq óńirge Qazaqstan Premer-Mınıstri, sý tasqynyna qarsy is-sharalardy úılestirý jáne sý tasqynynyń saldaryn joıý jónindegi respýblıkalyq shtabtyń jetekshisi Oljas Bektenov kelip, Sergeev sý qoımasyndaǵy jaǵdaıdy tekserdi.