SQO-nyń kýrorttyq aımaǵynda 15 ınvestıtsııalyq joba júzege asyrylyp jatyr

PETROPAVL. KAZINFORM — Soltústik Qazaqstan oblysynyń Imantaý-Shalqar kýrorttyq aımaǵynda jyl boıy jumys isteıtin eko-qonaqúıler men glempıngter salynyp jatyr.

SQO kásipkerlik jáne ındýstrııalyq-ınnovatsııalyq damý basqarmasynyń málimetinshe, 15 ınvestıtsııalyq jobany júzege asyrýǵa kásipkerler 3,3 mlrd teńge jumsamaq. 2027 jyly tolyq paıdalanýǵa beriledi. 

Óńirdegi demalys oryndaryndaǵy basty másele — jol jáne ınternettiń nasharlyǵy. Olar birtindep sheshilip jatyr.

— Byltyr jergilikti bıýdjet esebinen jalpy uzyndyǵy 8,5 km bolatyn
— 4 jolǵa shamamen 800 mln teńge bólinip, jóndeldi. Bıyl jumys jalǵasyp, uzyndyǵy 12,1 km bolatyn 5 jol 990 mln teńgege jóndeldi.

Tsıfrlandyrý aıasynda jalpy uzyndyǵy 5,2 km optıkalyq-talshyqty kabel tóseldi. Osy jumys nátıjesinde Shalqar kóliniń jaǵalaýynda ornalasqan 7 demalys aımaǵy ınternetke qol jetkizdi. Aldaǵy jyly qalǵandaryna ınternet jelisi tartylady.

Sonymen qatar, «Kókshetaý» ulttyq tabıǵı parkiniń baqylaý-ótkizý beketterinde QR-kod arqyly tólem jasaý múmkindigi bar avtomatty shlagbaýmdar ornatyldy, — deıdi basqarma basshysy Darhan Ámrın.

Mamannyń aıtýynsha, qazirgi ýaqytta ulttyq parktiń bas josparyna túzetýler engizilip, qoldanystaǵy týrıstik marshrýttardy qaıta qarap, olardyń pasporttary jańartylyp jatyr. Nátıjesinde qoldanystaǵy soqpaqtar negizinde týrısterge berdvotchıng baǵyttaryn quryp, aımaqqa tán qustardy tamashalaýǵa múmkindik týady.

— Týrıstik bıznes sýbektileri de qoldanystaǵy demalys oryndaryn keńeıtý jáne jańǵyrtý jumystaryn júrgizip jatyr. Máselen, «Jemchýjına» demalys bazasynda 7 qysqy úıdiń qurylysy bastaldy, qosymsha taǵy 7 úı salý josparlanǵan. «Janabaev B» demalys bazasynda 3 kottedj jáne ashana paıdalanýǵa berildi. «Aytas» demalys bazasynda keńeıtý jumystary júrgizilip, ashana qurylysy aıaqtaldy. Qazir 50 oryndyq 3 kottedjdiń qurylysy jalǵasqan, — deıdi Darhan Ámrın.

Ulttyq statıstıka bıýrosynyń málimetinshe, bıylǵy toǵyz aı ishinde SQO-ǵa 134 myńǵa jýyq adam qydyryp kelgen. Bul ótken jyldyń uqsas merzimimen salystyrǵanda 16% joǵary. 127 myńy ishki týrıster bolsa, 7 myńnan astam adam syrttan kelgen. Sondaı-aq týrısterdiń 68 myńy Petropavldy aralasa, 36 myńǵa jýyǵy Aıyrtaý aýdanyna demalysqa attanǵan.

Buǵan deıin Ulytaýda týrızm salasyna 3 mlrd teńge ınvestıtsııa tartylǵanyn jazǵan edik.