SQO-nyń Qyzyljar aýdanynda tasqynnyń zardabyn baǵalaý jumysy 20 mamyrǵa deıin aıaqtalady

PETROPAVL. KAZINFORM – Soltústik Qazaqstan oblysy Qyzyljar aýdanynda sý tasqyny kezinde 1546 úı sý astynda qaldy. Qazirgi ýaqytta baspanalardan sý tolyq ketti.

SQO ákimdiginiń málimetinshe, 1,5 myń otbasy jalpy somasy 543 mln teńge birjolǵy áleýmettik kómek aldy.

«Qazirgi ýaqytta úılerdiń 80% tehnıkalyq tekseristen ótti. Bul jumysqa óńirdegi akkredıtatsııasy bar úsh JShS – 10 maman tartylǵan. Jumys kóp bolǵandyqtan qosymsha astanalyq jáne kókshetaýlyq sarapshylar da jumys istep jatyr. Qazirgi ýaqytta Beskól, Teplıchnoe jáne Prıbrejnoe eldi mekenderinde tehnıkalyq tekseris aıaqtalýǵa jaqyn. Áli 416 úıdi zerttep shyǵý kerek. Bul baspanalar negizinen Bolshaıa Malyshka eldi mekeninde ornalasqan», - deıdi ákimdik mamandary.

Qazirgi ýaqytta Qyzyljar aýdanynda 96 tehnıkalyq qorytyndy berilgen. Sonyń negizinde akt toltyrylyp, úıdi qalpyna keltirýge 1,5 men 10 mln teńge aralyǵynda tólem jasalǵan.

«Materıaldyq shyǵyndy baǵalaý jáne ornyn toltyrý boıynsha komıssııanyń sheshimimen Bogolıýbovo eldi mekenindegi 9 otbasyǵa basqa úı alyp berilmek. Jalpy qazirgi ýaqytta tasqynnyń saldaryn joıýǵa Aqqaıyń aýdanynyń 45 adamnan turatyn 5 mehbrıgadasy jumyldyrylǵan. Olar Teplıchnoe men Prıbrejnoe eldi mekenderinde jumys istep jatyr. Sondaı-aq qaýipti ınfektsııalyq aýrýlardyń taralýyna jol bermeý maqsatynda sý basqan úıler tazartylyp jatyr. Qyzyljar aýdanynda úılerdi tehnıkalyq tekserý 20 mamyrǵa deıin aıaqtalady. 23 mamyrǵa barlyq qajetti qujattar daıyn bolady», - deıdi ákimdik ókilderi.

Buǵan deıin SQO-da tasqyn bastalǵaly 4,8 mln tekshe metr sý sorǵyzylǵanyn aıtqan edik.