SQO-nyń kıeli oryndary topografııalyq kartaǵa toptastyryldy

Jobany Soltústik Qazaqstan memlekettik arhıvi «Qazaqstannyń kıeli jerleriniń geografııasy» baǵdarlamasy aıasynda júzege asyrdy. Kıeli oryndar kartasyna oblys aýmaǵyndaǵy 34 tarıhı-mádenı eskertkish engizildi.

Olardyń qatarynda memorıaldyq keshender, mýzeıler, meshitter, shirkeýler jáne batyrlar keseneleri bar. Sonyń ishinde respýblıkalyq mańyzy bar kıeli nysandar qataryna engen Qarasaı men Aǵyntaı memorıaldyq kesheni, «Abylaıdyń rezıdentsııasy» mýzeıi, Botaı qonysy, Qojabergen jyraý, Qulsary batyr, Noǵaıbaı bı, Aqan seri keseneleri jáne Ýálıhanovtar áýletiniń qonysy bar.

- Elimizdiń árbir jeri – ózen-kóli, ormany, keń dalasy biz úshin kıeli. 2017 jyly biz EKSPO-ǵa kıeli jerler kartasyn ázirledik, biraq oǵan óńirdegi iri nysandar ǵana kirdi. Bul negizinen Reseı, Mońǵolııadan alynǵan 2 myńnan astam respýblıkalyq kartalar bazasynan jasalynǵan SQO-nyń topografııalyq kartasy. HІH ǵasyr men HH ǵasyrdyń basynda anyqtalǵan eldi mekenderdiń ataýlary sol kúıinde qazaqı belgilengen. Tarıhı oryndar ǵana emes, áýlıelerdiń mazary, tarıhı oqıǵalar bolǵan jerlerdiń ataýlary, osy ólkede kezinde belgili bolǵan, biraq esimi umyt qalyp, zertteýdi qajet etetin atalarymyzdyń zıraty tabylyp, engizildi, - deıdi Soltústik Qazaqstan memlekettik arhıviniń dırektory Sáýle Málikova.

Bul kartanyń avtory – belgili tarıhshy, zertteýshi, shejireshi jáne kartograf Ǵızat Tabýldın.

- Ǵızat Tabýldın buǵan deıin Aqmola oblysynyń kıeli jerler kartasyn jáne Qostanaı oblysynyń atlasyn jasady. Biz de bolashaqta oblystyń atlas kartasyn qurastyrýdy josparlap otyrmyz, - deıdi Sáýle Málikova.

Kıeli jerler kartasy, uıymdastyrýshylardyń aıtýynsha, óńir tarıhyna jańasha kózqaraspen qaraýǵa múmkindik beredi. Sonymen qatar ol zertteýshiler men týrıster úshin mańyzdy aqparat kózine aınalmaq.

Buǵan deıin Mańǵystaýdaǵy kıeli oryn — Masat ata qorymy men jerasty meshiti týraly jazǵan edik.