SQO-nyń keı aýdandarynda sý negizsiz qymbatqa satylyp kelgen

PETROPAVL. KAZINFORM – Soltústik Qazaqstan oblysynda prokýrorlardyń aralasýynan keıin keı aýdandarda sý tarıfi tómendedi.

SQO prokýratýrasynyń málimetinshe, qadaǵalaý organy taldaý aıasynda tabıǵı monopolııalar týraly zańnamanyń óreskel buzylǵanyn anyqtady.

Máselen, Aıyrtaý, Qyzyljar, M. Jumabaev, Mamlıýt, Taıynsha aýdandarynyń tabıǵı monopolııalar sýbektileri tarıfterdi qalyptastyrý qaǵıdalarynyń talaptaryna qaıshy, kásipkerlerden olardyń tutynýshylardyń ekinshi toby, ıaǵnı zańdy tulǵa bolǵanyna qaramastan, sýmen jabdyqtaý úshin 2019 jyldan bastap bıýdjettik uıym retinde negizsiz aqy alǵan. 

Prokýrorlyq qadaǵalaý aktileri boıynsha kináliler zań boıynsha jaýapkershilikke tartyldy, kásipkerlik sýbektileri úshin sýmen jabdyqtaýǵa arnalǵan tarıfter sáıkestendirildi. Máselen Qyzyljar aýdanynda qoldanylǵan sharadan keıin kásipkerlerge sý tarıfi 1017,63 teńgeden 343,41 teńgege nemese 66% deıin tómendetildi.

Sol sııaqty Mamlıýt aýdanynda 787,72 teńgege nemese 59,7%, M.Jumabaev aýdanynda 30 teńgege nemese 2,7%, Taıynshada 2,48 teńgege nemese 0,3% tarıfter tómendetildi.
Jyl basynan beri prokýratýra aktileri boıynsha barlyǵy 5 myńnan astam tutynýshynyń, onyń ishinde 357 kásipkerdiń quqyǵy qorǵaldy.

Buǵan deıin SQO-da aqpanda ınflıatsııa jyldyq esepteýmen alǵanda 10% jetkenin jazdyq.

Ulttyq statıstıka bıýrosynyń SQO boıynsha departamentiniń málimetinshe, baǵalar bıylǵy aqpanda, ótken jylǵy aqpanmen salystyrǵanda, azyq-túlik taýarlaryna — 7%, azyq-túlik emes taýarlarǵa — 11, aqyly qyzmetterge 14% ósti.