SQO-nyń qaı aýyldaryna bıyl taza sý jetedi
PETROPAVL. KAZINFORM – Soltústik Qazaqstan oblysynda aýyz sýmen qamtý máselesin sheshý úshin QR Sý resýrstary jáne ırrıgatsııa mınıstrligi 9 iri jobany iske asyryp jatyr.
Bul týraly búgin ákimdik otyrysynda «Esil sý» fılıalynyń dırektory Qanat Asqarov aıtty.
Bul jobalar Presnov, Sokolov, Esil (2 joba), Býlaev (4 joba) jáne Kókshetaý toptyq sý qubyrlarynyń qurylysyn jáne qaıta jańǵyrtý jumystaryn qamtıdy.
Osy maqsatqa bıyl Ulttyq qordan 11,7 mlrd teńge bólindi jáne áleýmettik mańyzdylyǵyn eskere otyryp, qosymsha arnaıy memlekettik qordan 30,3 mlrd teńge qarastyrylǵan. Jalpy qarjy kólemi – 42 mlrd teńge.
- Presnov toptyq sý qubyryn qaıta jańǵyrtýdyń birinshi kezeńinde 12 aýylǵa taza sý jetedi. Joba eki jylǵa shaqtalǵan. Jalpy quny 16,3 mlrd teńge. «Qazsýshar» RMK – bas merdiger. Búginde qarajattyń 5,9 mlrd teńgesi ıgerildi. Qurylys jumystary Stanovoe, Iskra, Maltsevo, Novomıhaılovka, Petrovka, Bekseıit, Voskresenovka, Andreevka aýyldarynda jáne Mamlıýtka qalasynda júrgizilip jatyr. Jobany tolyq aıaqtaý úshin qosymsha 3,9 mlrd teńge qajet, - dedi Qanat Asqarov.
2018 jyly bastalǵan Sokolov toptyq sý qubyry men aýylishilik jelilerdi salý jobasy aıasynda bıyl qurylysqa 3,3 mlrd teńge bólinip otyr. Jumys Novokamenka, Arhangelka, Kýstovoe, Sıvkovo-Vınogradovka, Penkovo, Dolmatovo jáne Jelıakovo aýyldarynda jalǵasqan. Kelesi jyly jumys tolyq aıaqtalady.
- Býlaev jáne Esil toptyq sý qubyrlarynda tozyǵy jetken 341 km jeli jańartylýy tıis. Joba quny - 21,6 mlrd teńge. Jumys kestege saı júrip jatyr, bıyl aıaqtalady. Al Kókshetaý toptyq sý qubyrynan 24 aýylǵa sý tartylady. Jobany júzege asyrýǵa 7,3 mlrd teńge qajet. Jospar boıynsha 220 km tartylýy kerek bolsa, sonyń 168 km salyndy. Bul nysan da bıyl paıdalanýǵa berilýi tıis, - deıdi fılıal dırektory.
Taıynsha aýdanynyń 14 eldi mekenine de taza sý jetedi. Joba tórt kezeńnen turady. Byltyr 371 mln teńge ıgerildi, qalǵan 13,1 mlrd teńge osy jyly bólindi. 175 km qubyrdyń 85 km salynǵan.
Al Aqjar aýdanyndaǵy 5 aýylǵa sý tartý úshin 162 km qubyr tóseledi. Jalpy quny – 7,4 mlrd teńge. Bul joba kelesi jyly aıaqtalmaq.
Buǵan deıin sý salasy mamandyqtaryna túsetin stýdentter úshin grant sany 70%-ǵa artatynyn jazǵan edik.