SQO-nyń energetıkalyq nysandaryn jónge keltirýge 24 mlrd teńgeden astam qarjy baǵyttalady
PETROPAVL. KAZINFORM — Qarajattyń 21 mlrd teńgeden astamy Petropavl jylý-elektr ortalyǵyn jóndeý jáne ınvestıtsııalyq baǵdarlamalardy júzege asyrýǵa jumsalady.
Qalǵan 3,2 mlrd teńge elektr jelilerin jańǵyrtýǵa baǵyttalady.
Soltústik Qazaqstan oblysynyń ákimdiginde óńirdiń jylý jáne elektr energetıkasy nysandarynyń qysqa ázirligi pysyqtaldy.
Petropavldaǵy № 2 jylý-elektr ortalyǵy 1961 jyldan beri jumys istep keledi. Búginde kásiporyn oblys ortalyǵyn jylýmen jáne elektr energııasymen qamtamasyz etetin negizgi nysandardyń biri. Onyń belgilengen elektr qýaty — 541 MVt, jylý qýaty — saǵatyna 713 Gkal.
— Bıyl jylý ortalyǵynda birqatar qazandyq pen týrboagregatqa jóndeý júrgizilip jatyr. Qazirgi tańda № 6 qazandyq agregaty men № 4 týrboagregatqa kúrdeli jóndeý aıaqtalǵan. Sondaı-aq № 4, 7 jáne 12 qazandyq agregattary men № 2, 6 jáne 7 týrboagregattaryna aǵymdaǵy jóndeý júrgizildi.
Al № 2 qazandyq jáne № 1 týrboagregatty qaıta jańǵyrtý, № 8, 9, 10 jáne 11 qazandyq agregattaryn kúrdeli jóndeý jumystary jalǵasqan, — deıdi «SEVKAZENERGO» kompanııasynyń bas dırektory Anatolıı Kazanovskıı.
Budan bólek, jylý ortalyǵynyń ǵımarattary men qurylystary jóndelip, kúl úıindisiniń bógetteri kúsheıtilip jatyr. № 3 tútin murjasyn qaıta jańǵyrtý jáne negizgi jabdyqtardy jóndeý de josparlanǵan.
Anatolıı Kazanovskııdiń aıtýynsha, bul jumystardyń barlyǵy bekitilgen kestege sáıkes júrgizilip jatyr. Negizgi maqsat — 2026-2027 jylǵy jylytý maýsymyn turaqty ótkizý, jabdyqtardyń daıyndyǵyn arttyrý jáne jospardan tys isten shyǵý jaǵdaılaryn azaıtý.
Energetıkalyq júıeniń taǵy bir mańyzdy bóligi — elektr jelileri. Soltústik Qazaqstan elektr jelilerin taratý kompanııasyna oblystaǵy 44,7 myń sharshy shaqyrym aýmaqta ornalasqan elektr jelileri qaraıdy. Onyń qaramaǵynda tórt qala men 381 eldi meken bar.
Ótken 2025-2026 jylǵy jylytý maýsymynda kompanııa jelilerinde 705 tehnologııalyq buzylý tirkelgen. Degenmen birinshi dárejeli apattar men isten shyǵý jaǵdaılary bolmaǵan.
Bıyl elektr jelilerin jónge keltirýge ınvestıtsııalyq jáne jóndeý baǵdarlamalary aıasynda 3,2 mlrd teńge bólindi. Qarajatqa birqatar qosalqy stantsııa men elektr jelilerin qaıta jańǵyrtý kózdelgen. Sonyń ishinde, «Tımırıazevo», «Sıbır» jáne «Smırnovo» qosalqy stantsııalary da bar.
Qazir barlyq jumystar bekitilgen merzimge saı júrgizilip jatyr. Kásiporynnyń málimetinshe, elektr jelilerindegi kúrdeli jóndeý jumystary jańa jylý berý maýsymy bastalǵanǵa deıin tolyq aıaqtalýy tıis.
Buǵan deıin Úkimette jylý berý maýsymyna daıyndyǵy tómen oblystar atalǵan edi.
