SQO-nyń burynǵy turǵyny qos azamattyqpen júrgen

PETROPAVL. KAZINFORM – Soltústik Qazaqstan oblysynyń Aıyrtaý aýdandyq soty qos azamattyǵy bar áıelge ákimshilik jaza taǵaıyndady.

SQO sotynyń málimetinshe, H. esimdi áıel óz kinásin moıyndap otyr.

Aıtýynsha, 2021 jyldyń jeltoqsan aıynda ol Reseı azamattyǵyn alǵan, keıin Qazan qalasyndaǵy Qazaqstan elshiligine Reseı poshtasy arqyly Qazaqstan Respýblıkasy azamatynyń tólqujatyn jáne jeke kýáligin jibergen. Osylaısha qujattar jetip, joıyldy dep oılaǵan.

Alaıda, keıin ony baqylap, teksermegen. 

2025 jyldyń aqpan aıynda Qazaqstan shekarasyn kesip ótip, ýaqytsha turýǵa ruqsat almaq bolady. Sol kezde onyń qos azamattyqpen júrgeni anyqtalǵan. 

Mamandardyń aıtýynsha, «Qazaqstan Respýblıkasynyń azamattyǵy týraly» QR Zańynyń 21 babyna sáıkes, shet memlekettiń azamattyǵyn qabyldaǵan adam ózge azamattyqty alǵan kúninen bastap kúntizbelik otyz kún ishinde bul týraly QR ishki ister organdaryna nemese QR shet elderdegi mekemelerine habarlaýǵa jáne Qazaqstan azamatynyń pasportyn jáne (nemese) jeke kýáligin tapsyrýǵa mindetti.

Sot qaýlysymen H. kináli dep tanylyp, oǵan ákimshilik aıyppul túrindegi ákimshilik jaza qoldanyldy.

Qaýly zańdy kúshine endi.

Buǵan deıin Shyǵys Qazaqstan oblysynda qos azamattyqpen júrgen 16 adam anyqtalǵanyn jazǵan edik.